Жол активтері сапасының ұлттық орталығы Qaztraffic 2025 көрмесіне қатысты

Астанада 21-халықаралық Qaztraffic көрмесі ашылды. Бұл ауқымды іс-шараға жол саласындағы 300-ден астам қазақстандық және халықаралық компания өкілдері қатысып жатыр.

Астанада 21-халықаралық Qaztraffic көрмесі ашылды. Бұл ауқымды іс-шараға жол саласындағы 300-ден астам қазақстандық және халықаралық компания өкілдері қатысып жатыр.

Qaztraffic-2025 ашылу салтанатына Қазақстан Республикасының көлік вице-министрі Мақсат Қалиақпаров қатысты. Ведомство басшысының орынбасары халықаралық көрмеге қатысушылардың кәсібилігі мен жоғары біліктілігін атап өтті.

"Қазір Қазақстанның жол саласы айтарлықтай жоғары деңгейде, мұны соңғы статистика дәлелдейді. Бүгінгі уақытта біз жол саласын дамытудың жеке бағдарламасын әзірлеп жатырмыз, онда біз ең жаңа технологияларды енгізуді жоспарлап отырмыз. Өздеріңіз білетіндей, президент Қасым-Жомарт Тоқаев алдымызға Қазақстанды Еуразияның негізгі көлік және логистикалық хабына айналдыру туралы міндет қойды. Қазіргі уақытта біз осы бағытта кең көлемде жұмыс істеп жатырмыз", - деді Мақсат Қалиақпаров.

Qaztraffic-2025 көрмесінің белсенді қатысушысы – соңғы алты жылда саланы жаңғыртудың негізгі қозғаушы күші болған Жол активтері сапасының ұлттық орталығы. ЖАСҰО мамандары жол құрылысының барлық кезеңінде техникалық ережелердің сақталуын бақылайды, пайдаланылатын жол құрылыс материалдарының сапасын ғылыми бағалауға ерекше назар аударады.

Жол активтері сапасының ұлттық орталығы РМК бас директоры Болатбек Айтбаев Qaztraffic халықаралық көрмесінің тәжірибе алмасу үшін маңызды екенін атап өтті.

"ЖАСҰО құрылғаннан бері осындай ірі іс-шараларға қатысып келеді. Qaztraffic-2025 көрмесі – озық тәжірибелермен бөлісудің тамаша платформасы. Мұнда кәсіпорынымыз үшін жаңа мүмкіндіктер ашатын пікір алмасу, тәжірибе толықтыру, әсіресе цифрландыру саласындағы технологияларға қатысты біздің цифрлық бағдарламаларымызға қызығушылық көп болды. Бүгінгі таңда ЖАСҰО инновацияларды белсенді түрде енгізіп жатыр: тестілеудің бәрі дерлік толығымен автоматтандырылған және цифрландырылған. Бұл тестілеуге, нәтижелерді алуға және өңдеуге кететін уақытты үнемдеуге, сондай-ақ сыбайлас жемқорлық тәуекелдерін азайтуға көмектеседі", - деді Болатбек Айтбаев.

Цифрландыру тұрғысынан ЖАСҰО отандық жол секторындағы көшбасшылардың қатарында. Орталық қазіргі уақытта Қазақстанның жол секторына қатысты барлық процесті біріктіретін E-JOLDAR жүйесін әзірлеу үстінде. Бұл электрондық платформа мемлекеттік органдардың өкілдері мен барлық жол операторына пайдалануға қолжетімді болады. E-JOLDAR жүйесінің алты модулінің үшеуі әзірленіп қойды.

Суреттер: Жол активтерінің ұлттық сапа орталығы

Qaztraffic-2025 бағдарламасына "Жолдар және инновациялар" атты халықаралық ғылыми-практикалық конференция да кіреді. Конференция барысында спикерлер саланың негізгі мәселелерін талқылап, прогрессивті шешімдерін бөліседі.

"Жол активтері сапасының ұлттық орталығы" РМК ұсынған материал