40 миллион және бес баланың тағдыры Сұлтан Сәрсемалиевтің ісі бойынша сот тағы не шешті

Атырауда Сұлтан Сәрсемалиевке қатысты өмір бойына бас бостандығынан айыру үкімі шыққаннан кейін, сот қосымша шешімдер қабылдады: оны жәбірленушіге моральдық зиян ретінде 40 миллион теңге төлеуге, мемлекет шығындарын өтеуге міндеттеді, сондай-ақ оның бес кәмелетке толмаған баласының алдағы тағдырын айқындады, деп хабарлайды Tengrinews.kz.

29 жастағы Сұлтан Сәрсемалиев - Атырау облысында қаралған ең резонансты қылмыстық істердің бірінің айыпталушысы. Ол төрт адамды - бұрынғы жұбайы Ақбаян Мұқанғалиеваның ата-анасын, ағасы мен қарындасын өлтірген.

Үкімді жариялау кезінде Атырау облыстық қылмыстық істер жөніндегі мамандандырылған ауданаралық сотының судьясы Зарема Хамидуллина қаза тапқандардың туыстарының азаматтық талап-арызы ішінара қанағаттандырылғанын хабарлады. Бұған дейін сот процесі барысында жәбірленуші тарап 70 миллион теңге көлемінде талап-арыз қойған болатын.

"Мұқанғалиеваның, Шылмағанбетованың азаматтық талап-арызы ішінара қанағаттандырылсын. Азаматтық жауапкер Сәрсемалиевтен талап қоюшының пайдасына моральдық зиянды өтеу ретінде 40 миллион теңге өндірілсін", - деді судья Зарема Хамидуллина.

Бұдан бөлек, сотталушыдан 9 926 теңге көлемінде мемлекеттік баж салығы өндірілді. Сәрсемалиевке азаматтық талап бойынша шешімді өз еркімен орындауға екі ай уақыт берілді, одан кейін өндіріп алу мәжбүрлі түрде жүзеге асырылады.

Сондай-ақ сот оны Жәбірленушілерге өтемақы қорына 30 АЕК - 117 960 теңге төлеуге міндеттеді. Сонымен қатар сотталушыдан сот сараптамаларын жүргізуге жұмсалған 2 512 128 теңге көлеміндегі шығын өндірілді.

Осылайша, іс бойынша ақшалай өндіріп алудың жалпы сомасы 42,6 миллион теңгеден асады.

Өмір бойына бас бостандығынан айыру үкімі шыққаннан кейін сот сотталған Сәрсемалиевтің бес баласын әрі қарай орналастыру мәселесін де қарастырды.

Зарема Хамидуллинаның сөзінше, балалардың тағдырын шешу Атырау қалалық білім бөліміне тапсырылды. Сотталған азаматтың бір жастан тоғыз жасқа дейінгі бес кәмелетке толмаған баласы бар.

Сот материалдарына сәйкес, үлкен үш бала қазір Атырау облысының Талғайран ауылындағы Кәмелетке толмағандарды бейімдеу орталығында. Кіші екі бала Атырау облысының Мамандандырылған балалар үйіне орналастырылды.

Сот уәкілетті органдарға балаларды әрі қарай орналастыру бойынша қажетті шараларды қабылдауды және нәтижелері туралы бір ай ішінде хабарлауды міндеттеді.

Сұлтан Сәрсемалиев өмір бойына бас бостандығынан айырылды

Еске сала кетейік, 14 шілдеде сот Сұлтан Сәрсемалиевті кісі өлтіру, алаяқтық, ұрлық, құжаттарды қолдан жасау және автокөлікті заңсыз иемдену бойынша кінәлі деп таныды. Қылмыстар жиынтығы бойынша оған өмір бойына бас бостандығынан айыру жазасы тағайындалды.

Іс материалдарынан белгілі болғандай, қылмыстар ұзаққа созылған отбасылық жанжал аясында жасалған. Тергеу мәліметінше, алғашқы кісі өлтіру оқиғасы 2025 жылдың мамыр айында болған, содан кейін айыпталушы қылмыс іздерін жасырып, қаза тапқандардың мүлкін иемденуге тырысқан.

Әрі қарай, іс материалдарында көрсетілгендей, Сұлтан Сәрсемалиев құрбандардың телефондары мен банктік деректерін пайдаланып, айналасындағыларды адастырып, олардың атынан жағдайды бақылауда ұстауды жалғастырған. Тергеу нұсқасы бойынша, кейбір эпизодтар қаза тапқандардың мәйіттерін жасырумен, сондай-ақ елден қашу әрекетімен байланысты. Айта кетейік, ұзақ уақыт бойы қаза тапқан отбасы хабар-ошарсыз кеткендер тізімінде болған.

Фото Атырау облыстық ПД

Еске сала кетейік, сотталушының әйелі - Ақбаян Мұқанғалиеваның отбасы мүшелерінің өліміне қатысы жоқтығына байланысты оған қатысты қылмыстық қудалау тоқтатылды. Психиатриялық сараптама нәтижелері бойынша әйел динамикалық бақылау мен дифференциалды диагностикаға мұқтаж.

Google News арқылы жаңалықтарымызды қадағалаңыз