Аптап ыстық жолды бүлдірді: Түркістан облысында жөндеу басталды

Бұған дейін «Қазгидромет» РМК өңірде ауа температурасының +44 °C-қа дейін көтерілуі мүмкін екендігі туралы дауылды ескерту жариялаған болатын.

16 шілде күні сағат 18:00 шамасында Шымкент – Түркістан бағытын жоспарлы патрульдеу барысында «ҚАЖсервис» ЖШС Түркістан облыстық филиалының №68 жол пайдалану учаскесінің мамандары жолдың 2243-шақырымында цементбетон жабынының жергілікті температуралық деформациясын дер кезінде анықтады.

Оқиға орны бірден қоршалып, уақытша жол белгілері орнатылып, жол қозғалысының қауіпсіздігін қамтамасыз ету шаралары қабылданды.

Қазіргі уақытта учаскеде жол қызметтері жұмыс жүргізуде. Арнайы техника жұмылдырылып, қалпына келтіру жұмыстары жалғасып жатыр. Жолдағы ақауды қысқа мерзімде жойып, көлік қозғалысын толық қалпына келтіру үшін барлық қажетті шаралар қабылдануда.

«ҚазАвтоЖол» компаниясы жол құрылысындағы жемқорлықты анықтады

Айта кету керек, ұзақ уақытқа созылған аптап ыстық кезінде цементбетон жабынына үлкен температуралық жүктеме түседі. Ауа температурасы +40 °C-тан асқанда жол жабынының температурасы +60…+70 °C-қа дейін, ал көлік қозғалысы қарқынды учаскелерде одан да жоғары көтерілуі мүмкін. Соның салдарынан бетон плиталары кеңейіп, олардың ішінде кернеу пайда болады. Мұндай жағдайлар әлемнің көптеген елдерінде ыстық кезеңде кездесетін табиғи пайдалану ерекшелігі болып саналады.

Қазіргі уақытта жол қызметтері цементбетон жабыны бар автомобиль жолдарына күшейтілген бақылау жүргізіп, тәулік бойы мониторинг жұмыстарын жалғастыруда.