АҚШ Ішкі қауіпсіздік министрлігі бюджет дауына байланысты жұмысын ішінара тоқтатты

Америкалық БАҚ-тың хабарлауынша, Конгрестегі демократтар мен республикашылар арасында бірнеше аптаға созылған келіссөздер нәтижесіз аяқталған. Тараптар Иммиграция және кеден қызметі (ICE) мен Кеден және шекара қызметі (CBP) сияқты бөлімдердің қызметін реформалау және бақылау мәселелері бойынша ортақ мәмілеге келе алмаған.

Демократтар Миннесота штатындағы оқиғалардан кейін қосымша қаржыландыруды федералдық иммиграциялық шараларға жаңа шектеулер енгізілмейінше қолдамайтынын мәлімдеді.

Бюджетке қатысты ымыраның болмауына байланысты министрлікте ішінара «шатдаун» басталды. Бұл бірқатар қызметтің, соның ішінде АҚШ Жағалау күзеті жұмысына іркіліс қаупін тудырды.

Қаржыландыру болмаған жағдайда «аса маңызды қызметкерлер» санатына жататын кейбір мамандар жалақысыз жұмыс істеуге мәжбүр болады, ал өзге қызметкерлер уақытша ақысыз демалысқа жіберіледі.

7 қаңтарда Миннеаполис қаласында ICE қызметкерлері мигранттарға қарсы операция кезінде 37 жастағы АҚШ азаматы Рене Николь Макклин Гудты атып өлтірген.

Кристи Ноэм әйелдің «ICE қызметкерлерін көлікпен қағып кетпек болғанын» мәлімдеді.

24 қаңтарда Миннеаполистегі наразылықтар кезінде тағы бір адам ұсталу сәтінде оққа ұшты. Билік мәліметінше, қаза тапқан — 37 жастағы америкалық медициналық қызметкер Алекс Джеффри Претти. Оқиға кезінде оның жанында қару болғаны хабарланды.

Осыған дейін АҚШ-тың Қазақстандағы елшісі иммиграциялық виза берудің уақытша тоқтатылуын түсіндірді.