Ақтаулық студенттер EL Travel жобасын қолға алды

Цифрлық форматтағы интерактивті жол көрсетушіге Маңғыстау облысындағы белгілі тарихи-мәдени ескерткіштер мен тылсым табиғи мекендер енгізіледі. Әзірге анықтамаға Бекет Ата жерасты мешіті, Ыбықтысай шатқалы, Шерқала тауы сияқты сегіз нысан кірді. QR-код арқылы әрқайсының тарихы, орналасқан жері жайлы ақпарат алып, қасиетті орындар туралы аңыздар мен деректер білуге болады. Анықтама брошюра түрінде баспаханада басылып, қонақүйлерде таратылады. EL-Travel жол көрсетушісінде алғаш рет облыстағы туристік бағыттар бір жүйеге келтірілген. Оның көмегімен Ақтаудан шыққан саяхатшылар Маңғыстау түбегін қай бағытта аралайтынын таңдай алады.

София Степанова, студент:

- Жол сілтеушіні саяхатшылар бір күннің ішінде бірнеше тарихи-мәдени ескерткіштерді немесе көрнекі табиғи орындарды аралап үлгеретіндей   қолайлы етіп жасауға тырыстым. Мысалы, Ыбықтысай шатқалына бара жатқанда Қараман ата жерасты мешітіне тәу етіп, жолай Қарағия ойпатын тамашалауға болады. Осының бәрін бір күнде аралап щығуға болады.

Эльвира Бисембайқызы, колледж  оқытушысы:

-  Болашақта біз студенттеріміз туристік нысандарға шықса дейміз. Олар экскурсия жүргізуші гид ретінде отандық, шетелдік саяхатшыларға өңіріміздің бетке ұстар тарихи-мәдени мұралары мен ерекше табиғи орындарын таныстыра алар еді.