Ақтөбеде мектеп оқушысы ағаш астынан пакетке оралған нәрестені тауып алды

Ақтөбеде жантүршігерлік оқиға болды: аулалардың бірінде мектеп оқушысы ағаштың түбінен жаңа туған нәрестені тауып алған, - деп хабарлайды Tengrinews.kz.

Ақтөбеде жантүршігерлік оқиға болды: аулалардың бірінде мектеп оқушысы ағаштың түбінен жаңа туған нәрестені тауып алған, - деп хабарлайды Tengrinews.kz.

Екі қабат пакетке оралған нәресте шұғыл түрде ауруханаға жеткізілді. Полиция баланың анасын іздестіріп жатыр. Баланы Гагарин көшесіндегі екі қабатты үйдің жанынан 11 жасар қыз тауып алған. Оқиға 23 мамырда болған.

"Өткен сенбіде ауламыздан 11 жастағы қыз пакетке салынған жаңа туған нәрестені тауып алды. Ол алдымен ақ пакетке, сосын қара пакетке салынып, аузы байланған екен. Қыз мияулағанға ұсқсас дыбысты естіп, ішінде марғау бар екен деп ойлаған. Кейін сыртына шығып қалған нәрестенің аяғын көрген", - дейді Ақтөбе тұрғыны Любовь Шестакова.

Жергілікті тұрғындардың айтуынша, нәресте табылған учаске баяғыдан мәселе тудырып келген: маңайда қараусыз қалған гараждар орналасқан, ал аумақтың өзі қоқысқа толы әрі қараусыз күйде.

"Осы жерді ретке келтіріп, гараждарды бұзса екен дейміз. Балалар бұл жерден өтуге қорқады. Енді, міне, баланы да осында тастап кетіпті. Қайта оны уақытында тауып алғаны жақсы болды", - дейді аудан тұрғындары.

Тұрғындардың бірі бала табыларға дейін, аз уақыт бұрын көршілері пакетті тастап кеткен әйелді көргенін айтады.

"Бесінші пәтердегі көрші бір әйелді көріпті. Ол алдымен пакетті үйдің бүйіріне тастап, кейін ағаштың түбіне ауыстырып қойып, тездетіп кетіп қалған. Бәлкім, ол баланың анасы шығар. Әйел үстіне қызыл көйлек киген. Нәресте жаңа туған, үсті-басы қан-қан болған", - деді Александр есімді жергілікті тұрғын.

Денсаулық сақтау басқармасы табылған нәрестенің ауыр халде ауруханаға жеткізілгенін хабарлады.

"23 мамырда қалалық балалар ауруханасына тоңып қалған, жаңа туған нәресте түсті. Ол жансақтау бөліміне жатқызылып, қажетті емдік шаралар жүргізілді. Қазір нәрестенің жағдайы тұрақты деп бағаланып отыр", - деді Ақтөбе облыстық денсаулық сақтау басқармасы басшысының орынбасары Айгүл Аманжолова.

Ақтөбе облысының полициясы баланың анасы әлі анықталмағанын хабарлады. Аталған факт бойынша Қылмыстық кодекстің 119-бабы "Қауіпті жағдайда қалдыру" бойынша тергеу жүріп жатыр.

Google News арқылы жаңалықтарымызды қадағалаңыз