Аралды құтқару: 40 тан астам экологиялық жоба жүзеге асырылып жатыр

АСТАНА, 10 қазан – Sputnik. Арал теңізі бассейнінде 40-тан астам экологиялық жоба жүзеге асырылып жатыр, деп хабарлады үкімет.

Астанада Қазақстанның төрағалығымен Халықаралық Аралды құтқару қоры басқармасының екінші отырысы өтті. Жиынға Қазақстанмен қатар, Өзбекстан, Түрікменстан және Тәжікстан өкілдері қатысты.

"Бүгінде халықаралық қоғамдастық бізден тек мәлімдемелер емес, нақты шешімдер күтеді. Арал теңізінің тағдыры, трансшекаралық суды тиімді әрі әділ пайдалану, табиғи ресурстарды сақтау – аймақтық қана емес, жаһандық маңызы бар мәселелер. Олар орнықты даму, азық-түлік пен энергетикалық қауіпсіздік, сондай-ақ миллиондаған адам тұрмысының сапасымен тікелей байланысты", — деді премьер-министрдің орынбасары Қанат Бозымбаев.

Қазіргі уақытта Арал теңізі бассейнінде 42 экологиялық жоба іске асырылып жатыр. Сонымен қатар Дүниежүзілік банктің қолдауымен екі аймақтық гранттық жобаны бастау мүмкіндігі пысықталып жатыр.

Отырыста қатысушылар Халықаралық Аралды құтқару қоры Атқарушы комитетінің 26 наурызды Арал теңізі, Әмудария және Сырдария өзендерінің халықаралық күні деп жариялау туралы ұсынысын назарға алды.