Биыл 323 шақырым болатын жылу желілеріне күрделі жөндеу жүргізілді

Биыл ұзындығы 323 шақырым болатын жылу желілеріне күрделі жөндеу жұмыстары жүргізілді.

Бұған 130 млрд теңге жұмсалды. Мемлекеттік энергетикалық қадағалау және бақылау комитеті төрағасы орынбасарының айтуынша, биылғы жылыту маусымында тұрғындар мен коммуналдық секторға 7,4 миллион тонна көмір қажет. Қазіргі таңда оның 86 пайызы дайын, көмір қоры жанармай қоймаларында сақталып тұр. Министрлік өкілдері апта сайын энергетикалық кәсіпорындарды аралап, жылыту маусымының барысын жіті бақылап отыр.

Илья Рожков, ҚР Энергетика министрлігінің мемлекеттік энергетикалық қадағалау және бақылау комитеті төрағасының орынбасары:

- Туындаған техникалық ақаулар уақытылы жойылып отыр. Биыл электр стансаларын жөндеуге 396,1 млрд теңге бөлінді, бұл өткен жылмен салыстырғанда 18%-ға көп. Ағымдағы жылы стансаларда 10 энергия блогы, 63 қазандық және 39 турбина жөндеу жоспарланған. Қазіргі уақытта бұл жұмыстар аяқталуға жақын. Сонымен қатар 17 мың шақырым электр желісі мен 420 қосалқы станса жөнделді. Барлық жұмыстар бекітілген жоспарға сәйкес жүргізілуде.