Киев Еуроодаққа кіру үшін қажетті реформаларды баяу жүргізіп жатыр БАҚ

АСТАНА, 10 шілде – Sputnik. Украина Еуропалық одаққа мүше болу үшін қажетті реформаларды ЕО елдері күткен қарқынмен жүргізіп жатқан жоқ, деп хабарлады Euractiv басылымы.

"Украина мен Молдова сыртқы байланыстар мен сыртқы саясатқа қатысты реформалардың алты кластерінің екіншісін ашады деп жоспарланып отыр. Алайда Еуроодақтың көптеген елі Киев осы уақытқа дейін бұдан да көбірек ілгерілейді деп күткен", – деп жазды басылым.

Сонымен қатар, ЕО мүшелігіне үміткер Балқан елдері – Черногория мен Албания – дәл осы мерзімге дейін келіссөздің үш тарауын аяқтауды жоспарлап отыр. Бұл олардың үш түрлі бағыт бойынша реформаларды аяқтағанын білдіреді.

Бұған дейін Владимир Зеленский Еуропалық одақты Украинаны 2027 жылы ұйым құрамына қабылдауға шақырған болатын. Алайда ЕО басшылары бірнеше рет Украина заңнамасының еуропалық стандарттарға толық сәйкес келмейтінін айтып, мүшелікке өтінімді қараудың негізгі шарттарының бірі жан-жақты реформалар жүргізу екенін мәлімдеген.

ЕО-ның сыртқы саясат жөніндегі жоғары өкілі Кая Каллас 15 ақпанда одаққа мүше елдер Украинаның ЕО-ға қашан қосылатыны туралы нақты мерзімді атауға дайын емес екенін мәлімдеді.