Өмір сүру қымбат: Алматы Астананы басып озды

Numbeo сервисі өмір сүру құны бойынша жаһандық рейтингін жаңартты. Тізімге Алматы мен Астананы қоса алғанда, 547 қала кірген. Рейтингте оңтүстік астана елорданы басып озып, өмір сүруге ең қымбат қала болып саналды, – деп хабарлайды Aikyn.kz.

Рейтинг өмір сүру құнының индексіне сүйеніп жасалған. Оны есептеу кезінде азық-түлік бағасы, дәмханалар мен мейрамханалардағы тамақтану құны, көлік шығыны, коммуналдық қызметтер және басқа да күнделікті шығын ескеріледі.

2026 жылдың ортасындағы жағдай бойынша, рейтингте 123,1 индексімен Цюрих қаласы көш бастады. Алғашқы ондықтағы орындардың дені – Швейцария қалаларына тиесілі.

Ал өмір сүру үшін ең арзан жер Үндістан қалалары болып шықты. Рейтингтегі соңғы 19 орынға түгелдей үнді елінің қалалары ілінген. 

Қазақстан мегаполистерінің ішінде Алматы жоғары сатыға жайғасты. Тізімде оңтүстік астана 409-орында тұр. Жаңартылған рейтингте Астана 469-орында. Қазақстан оңтүстік астанасында өмір сүру Баку және Батумиге қарағанда арзан, бірақ Киев пен Украинаның өзге де бірнеше қаласымен салыстырғанда қымбат дегенді білдіреді.