Оралда ерекше ферма бар

Оралдық өрендер енді бұғыға шана жегіп сырғанай алады.

Бірнеше жыл бұрын ашылған ерекше фермада солтүстік бұғысынан басқа қояндар мен хаски иттері, құлан тұқымдас аласа жылқылар да бар. Мұнда жан-жануарларды азықтандырып, олардың мінез-құлқын қызықтауға да болады.

Аязды күні сықырлаған аппақ қар. Тоғай шетінде қоңыраулатып келе жатқан бұғы жеккен шаналар. Орал өңірінде осы керемет көріністің пайда болуы жергілікті кәсіпкер Надежда Гурскаяның арқасы. Ол бірнеше жыл бұрын солтүстік жануарларын арнайы алдыртып, бұғы фермасын ашыпты.

Надежда Гурская, кәсіпкер:

- Солтүстік бұғысы ерекше мейірімді жануар. Адамға тез үйренеді. Еркелеткенді біледі. Өте ақылды. Менің білуімше, біздің елімізде ешбір жерде мұндай ферма жоқ. Сондықтан мен жерлестерімді қуантқым келді.

Фермада бұғыдан басқа хаски сұрыпты иттер мен қояндарды, жаннат пен тиіндерді, есек пен құлан тұқымдас ергежейлі жылқыларды кездестіруге болады. Олардың барлығына да жайлы жағдай жасалған. Демалушылар жоқ кезде жан-жануарлар қоршалған аумақта емін-еркін сейілдейді.

Наталья Пасконова, қала тұрғыны:

- Бүгін ертегілер әлеміне еніп кеткендей болдым. Мұнда бірінші рет келіп едік. Сиқырлы сәттерді бастан кештік. Әсіресе бұғыларды тамақтандырған қатты ұнады.

Бұғылар азыққа өте талғампаз келеді. Негізгі қорегі - бұғы мүгі. Өсімдіктің ол түрін солтүстіктен арнайы жеткізеді. Тамаққа сондай-ақ құрама жем қосады. Бұғы мүйізі жыл сайын түсетіндіктен, дәрумендермен байытылған тамақтың бұғы мүйізі өсуінде маңызы ерекше екен.

Надежда Гурская, кәсіпкер:

- Тәулігіне екі рет таңертең және кешке арнайы жеммен қоректендіреміз. Жемнің құрамына биологиялық қоспалар мен дәрумендер араластырамыз. Соның арқасында бұғылар біздің өңірге, біздің ауа райына тез бейімделді. Тіпті кейінгі жылдары бұзаулай бастады. Бұл өте тамаша.

Қазір фермада 10 бұғы бар. Кәсіпкер келешекте жануарлардың санын көбейтуді, қосымша теңбіл бұғыларды әкелуді, демалушыларға арналған үйлер салуды көздеп отыр.

Авторлары: Е.Жылқайдарұлы, Болат Жарылгасов, Эльдар Аюпов