Пәтерде жылу жоқ Алматы тұрғындары қайда хабарласуы керек

Алматыда жылыту маусымы басталғаннан кейін пәтерде жылу болмаса, құбырдан су кетсе немесе ақау шықса, қайда хабарласу керектігі ескертілді. Қала тұрғындары үшін 109 қауырт желісі мен бірыңғай диспетчерлік орталық жұмыс істейді, деп хабарлайды Tengrinews.kz.

Жылу болмаған жағдайда қайда хабарласу керек?

Алматыда 2026–2027 жылдардағы жылыту маусымы қарсаңында тәулік бойы жұмыс істейтін жедел әрекет ету штабы ашылады. Жылу болмағанда, су аққанда немесе басқа да ақаулар кезінде тұрғындар мына мекенжайларға хабарласа алады:

109 нөмірі бойынша; бірыңғай диспетчерлік орталыққа – 225-14-31; көппәтерлі тұрғын үйлерді басқару органдарына (ПИК/ОСИ); Open Almaty және e-Otinish сервистері арқылы; Алматы қалалық Коммуналдық инфрақұрылымды дамыту және Тұрғын үй инспекциясы басқармаларының әлеуметтік желілердегі ресми парақшалары арқылы. Жылу қалай қосылады?

Алматы қаласының Коммуналдық инфрақұрылымды дамыту басқармасы мен Тұрғын үй инспекциясы нысандарды жылуға қосу кезең-кезеңімен жүргізілетінін атап өтті.

Ең алдымен жылу әлеуметтік маңызы бар нысандарға – білім беру, денсаулық сақтау, әлеуметтік қорғау мекемелеріне, сондай-ақ халық үшін ерекше маңызы бар басқа да нысандарға беріледі.

Одан кейін жылу жүйесіне көппәтерлі тұрғын үйлер мен өзге де нысандар қосыла бастайды.

Пәтерде нені тексеру керек?

Алматы тұрғындарына радиаторлар мен тиек арматураларының жарамдылығын алдын ала тексеру ұсынылады. Бұл ретте жылу жүйесіне өз бетінше араласуға болмайды. Атап айтқанда, радиаторларды шешуге немесе суды ағызуға тыйым салынады – бұл апатты жағдайларға, жүйе жұмысының бұзылуына және тікқұбырлардағы жылудың өшіп қалуына әкеп соғуы мүмкін.

Сондай-ақ радиаторлар мен жылу тікқұбырларының алдын жауып тастауға немесе оларды қалың перделермен көлегейлеуге кеңес берілмейді. Бұл жылу беру деңгейін төмендетеді.

Жылу берілген алғашқы күндері алматылықтарға сақ болу ұсынылады: радиаторлар жоғары температураға дейін қызуы мүмкін. Әсіресе балалар мен үй жануарларының қауіпсіздігін қадағалау маңызды.

Бұған дейін Алматыда жылыту маусымы ертерек, 9 қазанда басталатыны хабарланды. Тұрғын үйлерді қосу 10 қазаннан басталады.

Бізді Google-дың негізгі дереккөздер тізіміне қосыңыз

Қосу