Павлодар өңірі энергетикалық хабқа айналады: Екібастұзда жаңа МАЭС салынады

Павлодар облысы көмір генерациясын дамыту жөніндегі ұлттық жобада стратегиялық өңір саналады.
Өткен жылы аймақ Қазақстандағы жалпы электр энергиясының 42%-ын өндірген. Энергетикалық қауіпсіздікті күшейту аясында Екібастұз ГРЭС-2 станциясының қуаты 1 ГВт-тан 2,1 ГВт-қа дейін ұлғайтылады. Сонымен қатар «таза көмір» технологияларын қолдана отырып, қуаты 2,64 ГВт болатын жаңа Екібастұз ГРЭС-3 станциясын салу және Ақсу ГРЭС-ін жаңғырту жоспарланған. Жаңа МАЭС-3 жылына 20 млрд кВт⋅сағ электр энергиясын өндіреді.

Генерацияны арттыру көмір өндірісін кеңейтуді талап етеді. Елдегі көмірдің 38%-ын өндіретін «Богатырь Көмір» ЖШС 2026 жылға қарай өндірісті 45,2 млн тоннаға, ал 2032 жылға қарай 56,5 млн тоннаға жеткізуді көздеп отыр. Осы мақсатта 2026–2032 жылдары 360 млрд теңге инвестиция салу жоспарланған.

Инвестициялар күрделі құрылысқа, жаңа технологияларды енгізуге, тау-кен техникасын жаңартуға және қолданыстағы қуаттарды жөндеуге бағытталады. Бұл энергетика секторын тұрақты көмірмен қамтамасыз етуге мүмкіндік береді.