Путин келіспеді, Трамптың жоспары аяқсыз қалды: Украинадағы соғыс қашан тоқтайды?

Кремльдегі келіссөздерден кейін Ресей президентінің көмекшісі компромиске келетін тұстар әлі табылмағанын, ал АҚШ делегациясы Киевке бару жоспарын тоқтатқанын хабарлады, деп жазады Arasha.kz.

ВВС мәліметінше, АҚШ президентінің арнайы өкілі Стив Уиткофф пен оның күйеу баласы, кәсіпкер Джаред Кушнер Владимир Путинмен кездесуді кеш бастып, түн ортасында аяқтады. Келіссөздер шамамен бес сағатқа созылған.

Бастапқыда америкалық делегация Мәскеудегі келіссөздерден кейін Киевке баруы тиіс еді. Алайда Ресей президентінің көмекшісі Юрий Ушаковтың айтуынша, Уиткофф пен Кушнер Мәскеуден бірден Вашингтонға оралып, Ресей тарапына телефон арқылы қайта хабарласпақ.

Келіссөздер нәтижесі

Владимир Путинмен кездесуде Ресей тарапынан Юрий Ушаков та болды. Журналистерге берген мәліметінде ол Трамп ұсынған бейбіт жоспар бойынша ортақ шешімге келу әзірге мүмкін болмағанын, бірақ кейбір америкалық ұсыныстардың Мәскеу үшін "қабылдауға болатындай" екенін айтты.

Ушаков Ресей белгілі бір бағыттарда келісімге келуге дайын екенін, бірақ АҚШ жоспарының бірқатар тұсы Мәскеудің сынына ұшырағанын мәлімдеді.

Сондай-ақ:

АҚШ Трамптың бастапқы 28 тармақтан тұратын жоспарына қосымша төрт құжат тапсырған; Талқылау нақты тармақтарға емес, жалпы АҚШ-тың Украина бойынша бейбіт бастамасына бағытталған; Кейбір мәселелер бойынша Ресейдің қарсылығы сақталып отыр.

Ушаковтың айтуынша, территория мәселесі негізгі даулы тақырыптың бірі болған.

"Территориялық мәселелер талқыланды. Онсыз украин дағдарысын шешу мүмкін емес. Сондай-ақ Ресей мен АҚШ арасындағы экономикалық ынтымақтастық перспективалары да сөз болды", – деді ол.

Қатысушылар пікірталасты "пайдалы" және "өнімді" деп бағалады.

Путин Трампқа АҚШ делегациясы арқылы сәлем жолдап, өзінің "саяси сигналдарын" жеткізген. Ал қос президенттің кездесуі дағдарысты реттеу бойынша алға жылжу деңгейіне байланысты болмақ.

Украинадағы жағдай мен ықтимал келісімдер

АҚШ мемлекеттік хатшысы Марко Рубио Fox News арнасына берген сұхбатында Киев пен Мәскеу арасындағы келіссөздерде белгілі бір прогресс бар екенін айтты. Оның сөзінше, басты дау – Украина бақылауында қалған ДХР аумағының 20%-ы.

"Қазір тараптар дәл сол аумақтар үшін таласып отыр. Қосымша 30-50 шақырым жер мәселесі де бар", – деді Рубио.

Ол АҚШ бұл тақырыпта белгілі бір ілгерілеуге қол жеткізгенін, Украина үшін қауіпсіздік кепілдіктерін анықтау мәселесі шешуші рөл атқаратынын атап өтті. Бұрынғы португалиялық барлау офицері Алешандри Геррейру да Вашингтонның қысымы әсерінен Украинаға территориялық жеңілдіктерге баруға тура келуі мүмкін деген пікір білдірді.

"Бұл – АҚШ тарапынан Киевке жасалған анық сигнал. Украина халқын осыған дайындау қажет екенін көрсетіп тұр", – деді ол.

Украинадағы ішкі саяси жағдай

Украинада саяси ахуал да күрделене түсті. Бұған дейін Зеленский кеңсесін басқаратын Андрей Ермак коррупциялық жанжал себепті отставкаға кеткен. Экс-СІМ басшысы Дмитрий Кулеба оның Кушнермен байланыс орнатуға қарсы болғанын айтты. Ол кезде Зеленский Ермакты қолдаған.

Кулеба Украинаны "тактикалық жеңіліс, бірақ стратегиялық жеңіс" күтіп тұрғанын айтты. Оның сөзінше, алда өте қиын кезең келеді, бірақ ол елдің болашағын айқындауға мүмкіндік береді.

Ресейдің талаптары

NBC News дерегінше, Мәскеу АҚШ-тың бейбіт жоспары аясында үш негізгі талабынан бас тартпайды:

Донбастың толық бақылауы; Украина қарулы күштерін қысқарту; Жаңа ресейлік аймақтарды АҚШ пен Еуропаның халықаралық түрде мойындауы.

Алайда Ресей тоқтап тұрған активтер мәселесін талқылауға дайын болуы мүмкін. Трамп жоспары бойынша, Еуропадағы ресейлік активтердің шамамен үштен бірі – 100 млрд долларға жуық қаражат Украинаны қалпына келтіруге жұмсалуы тиіс.