Қатар Ираннан келтірілген шығын үшін өтемақы талап етіп жатыр

Қатардың сыртқы саяси ведомствосы БҰҰ Бас хатшысы Антониу Гутерришке, сондай-ақ БҰҰ жанындағы Бахрейннің Тұрақты өкілі және Қауіпсіздік Кеңесінің төрағасы Жамал Фарес ар-Ровайеге Иранның ел аумағына жасаған шабуылдарына байланысты хат жолдады.

Хаттарда Иран шабуылдарының нысанасы азаматтық нысандар болғаны атап өтілген. Мұндай әрекеттер 1949 жылғы Женева конвенцияларын және оларға қосымша хаттамаларды, сондай-ақ халықаралық гуманитарлық құқық нормаларын өрескел бұзу болып саналады.

— Иран Ислам Республикасының заңсыз әрекеттері халықаралық жауапкершілікке әкеледі және жағдайға қарай Қатар мемлекетіне келтірілген барлық шығынды өтеуді міндеттейді, — делінген Қатар СІМ мәлімдемесінде.

Ведомство сондай-ақ шабуылдар салдарынан келген барлық шығын мен залалды тиісті органдар бағалайтынын атап өтті. Сонымен қатар, Қатар БҰҰ мен Қауіпсіздік Кеңесін жағдайдың одан әрі дамуы туралы хабардар етуді жалғастырады.

Бұған дейін АҚШ пен Иран арасындағы келіссөздердің алғашқы кезеңі 11 сәуірде өтетіні хабарланған болатын.

Сондай-ақ БАӘ Ормуз бұғазында кеме қатынасы еркіндігіне кепілдік беруді талап етті.