Қазақстандықтар ұзақ демалыста қайда барды ең көп жүктелген трассалар аталды

Шілденің басындағы ұзақ демалыс күндері қазақстандық жолдар үшін нағыз сынақ болды. 4-6 шілде аралығында республикалық тасжолдарда 3,9 миллионнан астам көлік қозғалысы тіркелді, деп хабарлайды Tengri Auto "ҚазАвтоЖол" ҰҚ" АҚ-ға сілтеме жасап.

Статистика саяхатқа нақты қанша адам шыққанын көрсетпегенімен, қай бағыттар сұранысқа ие болғанын анықтауға мүмкіндік береді.

Көлік ағыны бойынша Шымкент – Қызылорда учаскесі көш бастады. Үш күнде бұл бағытта 442 056 көлік жол жүру тіркелді. Оңтүстік бағыт жаз мезгілінде дәстүрлі түрде ең қарбалас жолдардың бірі болады: жүргізушілер туыстарына, демалыс орындарына және туристік маршруттар бойынша сапар шегеді.

Екінші орынды Астана – Щучье жолы иеленді, бұл бағытта 386 164 автомобиль жүріп өткен. Бұл Бурабайдың елорда тұрғындары үшін демалыс күндері баратын ең танымал орындардың бірі екенін тағы да дәлелдейді.

Үштікті Тараз – Қайнар учаскесі түйіндеді, мұнда 324 863 көлік қозғалысы байқалды. Сондай-ақ жүктеме артқан жолдар қатарына Шымкент – Тараз (303 800) және Шымкент – Өзбекстан шекарасы (269 750) бағыттары енді.

Алматыдан шығатын жолдарда да қозғалыс қарқынды болды. Мереке күндері Алматы – Қонаев тасжолымен 306 966 автокөлік жүрген.

Сонымен қатар Алматы – Қорғас (197 499) және Қонаев – Талдықорған (194 119) бағыттарында қарқынды қозғалыс байқалды.

Елдің солтүстігі мен шығысында Астана – Теміртау (227 477), Астана – Павлодар (217 888) тасжолдары мен Павлодар – Семей – Қалбатау бағыттарында (үш күнде 198 930 көлік) көлік ағыны көп болды.

Мұндай статистика қазақстандықтар демалысқа автокөлікті жиі таңдайтынын көрсетеді. Қысқа мерзімді саяхаттар, көл жағасына, тауға және курорттық аймақтарға бару ұзақ демалыс күндерін өткізудің ең танымал форматтарының бірі болып қала береді.

Жүргізушілерге алыс жолға шықпас бұрын бағытты алдын ала жоспарлап, көліктің техникалық күйін тексеру және жолдағы ықтимал кептелісті ескеру қажет екенін еске салайық. Әсіресе, танымал бағыттарда көлік ағыны айтарлықтай артатын мереке күндері мұқият болу маңызды.

Жылдамдық режимін сақтау, ауа райын бақылау және шаршаңқы күйде жолға шықпау өте маңызды. Ұзақ жолда бірнеше сағат сайын қысқа аялдама жасаған жөн: бұл шаршауды басып, рульде зейін қоюға көмектеседі.

Тағы оқыңыз: Автосаяхатқа шығу: сапар сынаққа айналмас үшін маршрутты қалай жоспарлау керек?

“Айна әсері“: аптапта тасжолдарда қандай жасырын қауіп пайда болады?

Google News арқылы жаңалықтарымызды қадағалаңыз