“Қол тигізбеңіз!“ Ақмола облысында Қызыл кітапқа енген өсімдіктер гүлдеді

"Бурабай" ұлттық паркінде сирек кездесетін ерте көктемде гүлдейтін өсімдіктер, соның ішінде Қызыл кітапқа енген адонис, яғни жанаргүл бүршік жарды. Ұлттық парк өкілдері көздің жауын алатын сары гүлдерге тиіспеу қажеттігін ескертті - оларды терудің соңы ауыр салдарға соқтыруы мүмкін, деп хабарлайды Tengri Travel.

"Бурабай" ұлттық паркінде сирек кездесетін ерте көктемде гүлдейтін өсімдіктер, соның ішінде Қызыл кітапқа енген адонис, яғни жанаргүл бүршік жарды. Ұлттық парк өкілдері көздің жауын алатын сары гүлдерге тиіспеу қажеттігін ескертті - оларды терудің соңы ауыр салдарға соқтыруы мүмкін, деп хабарлайды Tengri Travel.

Қандай өсімдіктер гүлдеді?

Жанаргүлдің гүлдегені туралы ұлттық парк өзінің Instagram-дағы парақшасында хабарлады.

"Бурабай" мемлекеттік ұлттық табиғи паркінде көктемгі алғашқы гүлдер қарқынды түрде бүршік жарып жатыр. Ғылым, ақпарат және экологиялық мониторинг бөлімі деректеріне сәйкес, ұлттық парк аумағында Қазақстанның Қызыл кітабына енгізілген ашық және сарғыш түсті ұйқышөп (прострел), көктемгі және Еділ адонисі анықталды", - делінген жазбада.

Мамандардың айтуынша, нәзік көрінгенімен, алғашқы гүлдер экожүйеде маңызды рөл атқарады.

"Олар тозаңдандырушы жәндіктер үшін алғашқы нектар мен тозаң көзі болып, табиғи тозаңдану үдерістерінің басталуына ықпал етеді. Мұндай өсімдіктерді жинау олардың популяциясының азаюына және біртіндеп жойылуына әкелуі мүмкін. Сонымен қатар, тамыр жүйесі зақымданып, топырақ жамылғысы бұзылады, бұл бүкіл экожүйенің жағдайына кері әсерін тигізеді", - деді ұлттық парк әкімшілігі.

Instagram-дағы бұл жазбаны көру

A post shared by ҚР ПІБ "Бурабай" Мемлекеттік ұлттық табиғи паркі" ММ (@parkburabay)

Ғалымдар бұл гүлдердің "көктемді" қалай бастайтынын түсіндірді:

Әсер ету тізбегі:
• алғашқы гүлдер қыстан кейін алғашқы нектар мен тозаң береді
• тозаңдандырушы жәндіктер қоректеніп, белсенді бола бастайды
• жәндіктер басқа өсімдіктерді тозаңдандырады
• өсімдіктер тұқым мен жеміс түзеді
• жемістер құстар мен жануарларға қорек болады
• экожүйе тұрақтылығы мен биоәртүрлілік сақталады

Сонымен қатар, адонис сырт көзге зиянсыз көрінгенімен, улы болып келеді.

"Ұлттық парк мамандары алғашқы гүлдерге ұқыпты қарау қажеттігін және оларды жұлуға болмайтынын ескертеді. Оларды сақтау табиғи үдерістердің тұрақтылығы мен аумақтың биологиялық әртүрлілігімен тікелей байланысты", - деп түсіндірді ұлттық парк әкімшілігі.

Туристерге де ескерту жасалды: гүлдерді тамашалауға болады, бірақ жұлуға болмайды. Ұлттық парк мамандары гүлдерді басу немесе жұлудың орнына, жай ғана суретке түсіріп алуға кеңес берді.

Еске сала кетейік, Қазақстанның Қызыл кітабына өсімдіктің 387 түрі енгізілген, оның ішінде 65 түрі дәрілік өсімдік. Оларды жойғаны үшін 13 миллион теңгеге дейін айыппұл салып, тіпті 3 жылға дейінгі мерзімге бас бостандығынан айыру жазасы қарастырылған.

Google News арқылы жаңалықтарымызды қадағалаңыз

Жазылу