Сахна сыртындағы шындық: Рикки Мартин отыз жыл бойы нені жасырды?

Рикки Мартин — Пуэрто-Рикодан шыққан әнші, актер және латынамерикалық поп-музыканың әлемге таралуына үлкен ықпал еткен өнерпаздардың бірі. Оның шығармашылық жолы бала кезінен басталып, бірнеше онжылдық бойы жалғасып келеді. Испан және ағылшын тілдерінде ән айтқан орындаушы латын ырғақтарын поп, рок, би музыкасы мен сальса элементтерімен ұштастырып, халықаралық аудиторияға танытты.

1990 жылдардың соңында жарық көрген María, La Copa de la Vida және Livin’ la Vida Loca әндері Рикки Мартинді әлемдік деңгейдегі жұлдызға айналдырды. Оның табысы кейіннен Латын Америкасынан шыққан басқа орындаушылардың да ағылшынтілді музыка нарығына енуіне жол ашқан «латын музыкалық серпілісінің» маңызды бөлігі ретінде бағаланады.

Әншінің толық аты-жөні — Энрике Мартин Моралес. Ол 1971 жылғы 24 желтоқсанда Пуэрто-Риконың Сан-Хуан қаласында дүниеге келген. Өнерге деген қызығушылығы ерте байқалып, тоғыз жасынан бастап теледидар жарнамаларына түсе бастаған. 1984 жылы, он екі жасында, Рикки Мартин Латын Америкасында танымал болған Menudo жасөспірімдер тобының құрамына қабылданды. Топ мүшелері белгілі бір жасқа жеткеннен кейін жаңартылып отыратын. Сондықтан Menudo көптеген жас орындаушы үшін кәсіби сахнаға жол ашатын мектеп қызметін атқарды.

Рикки Мартин топ құрамында бес жылға жуық өнер көрсетті. Осы кезеңде ол түрлі елдерге гастрольдік сапармен шығып, студиялық жазбаларға қатысып, үлкен аудитория алдында ән айту тәжірибесін жинақтады. Жасөспірім шағында-ақ сахналық тәртіпті, би қимылдарын, камерамен жұмыс істеуді және көрерменмен байланыс орнатуды меңгерді.

Кейінгі сұхбаттарында әнші Menudo кезеңінің өзіне үлкен кәсіби тәжірибе бергенін, сонымен қатар тұрақты сапарлар мен қатаң жұмыс тәртібінің физикалық және психологиялық жағынан ауыр болғанын да айтқан. 

Menudo тобынан шыққаннан кейін Рикки Мартин өзін дербес әнші және актер ретінде танытуға ұмтылды. Мексикада театр қойылымдары мен телехикаяларға қатысуы оның бұрынғы жасөспірімдер тобының мүшесі ретіндегі бейнесінен алыстауына мүмкіндік берді. 1991 жылы Ricky Martin атты алғашқы жеке альбомы жарық көрді. Испан тілінде жазылған бұл альбом негізінен Латын Америкасының тыңдармандарына бағытталды. Ондағы шығармаларда романтикалық поп-музыка мен сол кезеңге тән жеңіл эстрадалық ырғақтар басым болды. 1993 жылы екінші альбомы — Me Amarás шықты. Бұл еңбектер орындаушыны испантілді аудиторияға танытқанымен, оның халықаралық деңгейге шығуына 1995 жылы жарық көрген A Medio Vivir альбомы ерекше ықпал етті.

Осы жинаққа енген María әні Еуропа мен Латын Америкасының көптеген елінде танымал болды. Әннің жылдам ырғағы, есте оңай сақталатын қайырмасы және би қимылдарына қолайлы құрылымы Рикки Мартиннің жаңа сахналық бейнесін қалыптастырды. Ол романтикалық әндер орындайтын жас әншіден латынамерикалық музыкалық мәнерді заманауи поп-музыкамен біріктірген орындаушыға айналды.

Рикки Мартиннің халықаралық деңгейдегі үлкен жетістігі 1990 жылдардың соңында басталды. 1998 жылы ол Францияда өткен футболдан әлем чемпионатына арналған La Copa de la Vida әнін орындады. Ырғағы мен көпшілік бірге айта алатын қайырмасы бар композиция әлем чемпионатының музыкалық нышандарының біріне айналды. 1999 жылғы Grammy марапаттау рәсімінде Рикки Мартин осы әнді орындап, америкалық аудиторияның назарын өзіне аударды. Grammy ұйымы бұл қойылымды әншінің мансабын және жалпы латын музыкасының халықаралық беделін жаңа деңгейге көтерген маңызды сәттердің бірі ретінде бағалайды

Сол жылы оның ағылшын тіліндегі Ricky Martin альбомы жарық көрді. Жинақтағы Livin’ la Vida Loca әні АҚШ пен Ұлыбританияның музыкалық рейтингтерінде бірінші орынға көтеріліп, әлемдік хитке айналды. Әннің табысы Рикки Мартиннің испантілді аудиториямен шектелмей, жаһандық музыка нарығына шығуына мүмкіндік берді.

Оның сахналық бейнесі де осы кезеңде толық қалыптасты. Әнші вокалды белсенді би қимылдарымен, латынамерикалық ырғақтармен және жарқын концерттік қойылымдармен біріктірді. Музыкасында поп, рок, сальса, кариб және би музыкасының элементтері қатар қолданылды. Кейінгі жылдары She Bangs, Nobody Wants to Be Lonely, Tal Vez және Vente Pa’ Ca секілді әндер оның танымалдығын сақтап қалды. Ол испан және ағылшын тілдерінде альбомдар шығаруды, әлемнің әртүрлі елінде концерт беруді жалғастырды.

Рикки Мартин музыкамен қатар актерлік өнерде де жұмыс істеді. Мексикада телехикаялар мен театр қойылымдарына қатысқаннан кейін, 1994–1995 жылдары америкалық General Hospital телехикаясында пуэрто-рикалық әнші Мигель Морестің рөлін сомдады.

Ол Бродвей сахнасында да өнер көрсетті. Алдымен Les Misérables мюзиклінде Мариустың рөлін орындады. 2012 жылы Evita мюзиклінің жаңартылған қойылымында Че образын сомдады. Бұл жұмыстар оның эстрадалық концертпен ғана шектелмей, музыкалық театр талаптарына да бейімделе алатын орындаушы екенін көрсетті.  2018 жылы Рикки Мартин сәнгер Джанни Версаченің өлімі туралы түсірілген The Assassination of Gianni Versace: American Crime Story телехикаясында Антонио Д’Амиконың рөлін ойнады. Осы жұмысы үшін ол шектеулі сериалдағы екінші пландағы үздік актер аталымы бойынша Primetime Emmy сыйлығына ұсынылды. 

Рикки Мартин қоғамдық және қайырымдылық жұмыстарымен де айналысады. Ол құрған Ricky Martin Foundation қоры балаларды қанауға, адам саудасына және мәжбүрлі еңбекке қарсы жобаларды қолдайды. 2003 жылы әнші UNICEF-тің ізгі ниет елшісі болып тағайындалды. Осы ұйым аясында ол балалардың құқықтарын қорғауға және адам саудасы мәселесіне назар аудартуға бағытталған бастамаларға қатысты.

Рикки Мартин ұзақ уақыт бойы өзінің жыныстық бағдары туралы ашық айтпады. Кейінгі сұхбаттарында ол бұған шоу-бизнес өкілдерінің қысымы, қоғамның реакциясынан қорқу және шындықты жариялау мансабына зиян келтіруі мүмкін деген қауіп әсер еткенін түсіндірді.

2000 жылы тележүргізуші Барбара Уолтерс сұхбат барысында әншіден қызтеке екені туралы тараған әңгімелерге тікелей жауап беруін сұрады. Рикки Мартин сол кезде нақты жауап бермеді. Кейін ол мұндай мәлімдеме жасауға психологиялық тұрғыдан дайын болмағанын және сұрақтың өзін қысымға түсіргенін айтты. Оның пікірінше, адамның жеке өміріне қатысты шындықты қашан және қалай жариялайтынын өзі шешуге құқығы бар. 

2008 жылы Рикки Мартин Маттео мен Валентино есімді егіз ұлдардың әкесі болды. Әке атануы оның жеке өміріне деген көзқарасын өзгертті. Әншінің айтуынша, әкесі оған балаларын шындыққа тәрбиелеу үшін алдымен өзі ашық өмір сүруі керектігін айтқан. Ал оның кәсіби ортасындағы кейбір адамдар мұндай мәлімдеме мансабының аяқталуына әкелуі мүмкін деп ескерткен. 

2010 жылғы 29 наурызда Рикки Мартин ресми сайтында ашық хат жариялап, өзінің қызтеке екенін мәлімдеді. Хатында ол өзін бақытты адам санайтынын және кім болғаны үшін ризашылық білдіретінін жазды. Кейінгі сұхбаттарында осы мәлімдемеден соң үлкен жеңілдік сезінгенін, енді жеке өмірінің маңызды бөлігін жасыруға мәжбүр болмағанын айтты.

Қазіргі уақытта Рикки Мартин жеке өмірі туралы бұрынғыдан ашық сөйлейді. Ол төрт баланың әкесі және сұхбаттарында әкелік міндетін өміріндегі маңызды жауапкершіліктердің бірі ретінде сипаттайды.

Рикки Мартин испан және ағылшын тілдерінде қатар үлкен табысқа жеткен алғашқы латынамерикалық поп-орындаушылардың бірі саналады. Оның репертуарында латын-поп, би музыкасы, сальса, реггетон және рок элементтері кездеседі.

Әнші екі Grammy сыйлығын иеленіп, сегіз рет осы марапатқа ұсынылған. Ол алғашқы Grammy жүлдесін Vuelve альбомы үшін алды. Кейін A Quien Quiera Escuchar альбомы да Grammy жеңімпазы атанды Latin Recording Academy мәліметі бойынша, Рикки Мартин төрт Latin Grammy сыйлығын иеленіп, 24 рет осы марапатқа ұсынылған. 2006 жылы оған Latin Recording Academy ұйымының «Жыл адамы» атағы берілді. 

Оның Livin’ la Vida Loca әні Billboard Hot 100 рейтингінде бірінші орынға көтерілді. Бұл композиция 1990 жылдардың соңындағы латын-поп серпілісінің басты әндерінің біріне айналды.

Рикки Мартин бірнеше онжылдыққа созылған мансабына қарамастан, концерттік қызметін жалғастырып келеді. 2026 жылы да ол халықаралық гастрольдер өткізіп, Еуропа мен басқа аймақтарда концерт берді. Қазіргі бағдарламаларында María, She Bangs, Vente Pa’ Ca, La Copa de la Vida және Livin’ la Vida Loca секілді танымал әндері орындалады. Оның концерттері вокал, би және көрнекі сахналық қойылымдарды біріктіретін шоу түрінде өтеді. 

Оның  әндері бірнеше буын тыңдарманына таныс. Оның шығармашылығы 1990 жылдардың соңындағы музыкалық кезеңмен ғана шектелмейді. Ол латынамерикалық музыканың халықаралық поп-мәдениетке енуіне ықпал еткен, әншілік, актерлік және қоғамдық қызметті қатар алып жүрген өнерпаз ретінде сахнадағы орнын сақтап келеді.

Назар аударыңыз: Бұл мақала авторлық құқықпен қорғалған. Мәтіннің толық нұсқасын көшіру, тарату немесе басқа басылымдарға жариялағанда авторы көрсетіп, Аikyn.kz сайтына  белсенді гиперсілтеме беру міндетті. Мақаланың жекелеген бөліктерін пайдаланғанда да осы талап сақталуы тиіс.