Шығысқа казино қажет пе?

Шетелдік туристерге арналған ойын бизнесі аймақтары Марқакөл мен Зайсан аудандарында құрылуы мүмкін дегенді естіген елдің пікірі сан-саққа жүгірген. Десе де, қазір бұл жоба мемлекеттік деңгейде талқыланып, казино тұрғызатын орындар қарастырылып жатыр. Ендігі сұрақ: құмар ойын-сауық орталығы ашылған жағдайда өңір экономикасына, жергілікті халықтың әлеуметтік жағдайына тигізер әсері қалай болар екен?

Суретті түсірген – автор

Қазір орталық мем­ле­кеттік органдар дең­гейінде ойын биз­не­сін дамыту үшін қосымша аумақ­тарды айқындау мәселесі пысық­талып жатыр. Шығыс Қазақстан облысында лайықты лока­циялар ретінде Марқакөл мен Зайсан аудандарына назар аударылып отыр. Бұл аудандар­ды еліміздің заңнамасына сәй­кес ойын қызметін жүзеге асыру аймақтары ретінде бекіту мәсе­лесі уәкілетті мемлекеттік орган­дардың қарауына берілген көрі­неді.

Шығыс Қазақстан облысы туризм басқармасының басшысы Ержан Сембинов мәселені алдын ала пысықтау үшін екі ауданда қоғамдық пікір зерделенгенін атап өтті.

«Былтыр 21 тамыз бен 2 қыркүйек аралығында шетел аза­маттарына арналған ойын ай­мақтарын құруға тұрғындар көз­қарасын анықтау мақсатында халық арасында әлеуметтік са­уалнама жүргізілді. Нәтижесінде, оған қатысқан респонденттердің басым бөлігі заңнама талаптары сақталған және халықтың әлеуметтік-экономикалық мүддесі ескерілген жағдайда шетелдіктерге арналған ойын аймақтарын ашуға қарсы емес екенін білдірді», деді басқарма басшысы Е. Сембинов.

Оның айтуынша, қарастыры­лып отырған жобалар ойын ин­фра­құрылымын ғана емес, сонымен қатар қонақүй секторы мен сервистік инфрақұрылымды қоса алғанда, ілеспе туристік нысандарды дамытуды да көздейді. Бастапқы кезеңде әлеуетті аймақ­тар­дың әрқайсына шама­мен 25–30 млрд теңге көлемінде жеке инвестиция тарту жоспарланған. Жобаны іске асыру жеке инвес­тор­дың қаражаты есебінен жүр­гізіледі.

«Алдын ала есептеулерге сүйен­сек, бір казино тұрақты жұ­мыс істейтін болса, бюджетке жы­лына шамамен 1,7 млрд теңге салық түсуі мүмкін. Бірақ оған қол жеткізу үшін шамамен 8–10 мың адам деңгейінде шетелдік турист ағыны болуы керек», деп түсіндірді Е.Сембинов.

Шекаралық аудандарда ойын бизнесін құру қосымша жұ­мыс орындарын ашуға ықпал етеді. Туризм басқармасының мәліметінше, бастапқы кезеңде шамамен 140 тұрақты жұмыс орнын құру қарастырылып отыр. Одан кейін инфрақұрылымның дамуына қарай бұл көрсеткішті 500-ге дейін жеткізу көзделген.

Туристік ойын-сауық инфра­құрылымын дамыту шағын және орта бизнеске де пайдалы. Яғни туристер көбейгенде қоғамдық тамақтану, көлік қызметі және басқа да сервистерге сұраныс артып, кәсіпкерлік белсенділік күшейеді. Бәсекелестік болады, бұл сапаның артуына жұмыс істейді.

Зайсан аудандық мәсли­ха­тының төрағасы Еркебұлан Зағыпаров қос ауданда қолға алынатын ойын бизнесі жобасы шекаралық аймақтардың әлеу­меттік-экономикалық дамуына тың серпін беретінін айтады. Дегенмен  депутат «таяқтың екі ұшы» болатын сияқты, бұл мәсе­­ленің де екінші жағы бар екенін естен шығармауды ескертті.

«Шекаралық аудандарда ойын бизнесі аймақтарын ашу ше­телден туристер көбірек тар­туға септігін тигізеді. Бұл әлеуметтік-экономикалық тұрғы­дан да тиімді. Егер жоба іске асса, жаңа қонақүйлер, қызмет көрсету орындары ашылып, жергілікті халыққа жұмыс орындары пайда болады, мемлекетке қосымша салық түседі. Тағы бір маңызды мәселе – ойын орталықтарының шетелдіктерге ғана қызмет көр­сетуі. Бұл ретте заң талап­та­рының сақталуын қатаң қада­ға­лау қажет. Қазақстан азама­тының, әсіресе жастардың құмар ойынға араласуына жол беріл­меуге тиіс. Өйткені оның әлеу­мет­тік, рухани әсері болуы мүмкін. Сондықтан осы жағын да қаперден шығармасақ», деді аудандық мәслихат төрағасы.

Туризм басқармасының хабарлауынша, бұл жоба шетелдік келушілерге арналған және туризмді дамыту құралының бірі ретінде ғана қарастырылған. Казино қызметін лицензиялау, олардың жұмысын бақылау мен заң талаптарының сақталуы, сондай-ақ қаржылық операциялардың ашықтығын қамтамасыз ету, кәмелетке толмағандарды кір­гізбеу, қоғамдық тәртіпті қа­да­ғалау сияқты мәселелер уә­кілетті мемлекеттік орган­дар­дың құзыретінде болады және еліміздің қолданыстағы заң­на­ма­лары шеңберінде жүзеге асырылады.

Шығыс Қазақстанның шека­ралық аудандары – Марқакөл мен Зайсанда шетелдік турис­терге арналған ойын бизнесі ай­мақ­тарын ашу мүмкіндігі қа­рас­тырылып жатыр. Жоба эко­номикалық тұрғыдан тиімді болғанымен, оның әлеуметтік және рухани әсерін де ескеру қажет дейді мамандар. Сон­дық­тан жобаны іске асыру кезінде заң талаптарының сақталуы мен қоғамдық тәртіпті қатаң қадағалау маңызды. Жалпы алғанда, бұл бас­тама шекаралық аудандардағы туризмді дамыту мен экономиканы жандандырудың тиімді құралы болары сөзсіз.

Шығыс Қазақстан облысы 

Соңғы жаңалықтар

Қазақы тағамның қасиеті

Экономика • Бүгін, 08:53

Атыраудағы бірегей зауыт

Өндіріс • Бүгін, 08:50

Жұмыссыздарға қандай қолдау бар?

Сараптама • Бүгін, 08:48

Көлік кептелісі шектен шықты: Әрбір жүргізуші жылына кемінде 50 сағат көшеде қаңтарылып тұрады

Қоғам • Бүгін, 08:45

Технология мен ғылымды тоғыстырған

Ғылым • Бүгін, 08:43

Алматы Кремний алқабына айнала ма?

Ғылым • Бүгін, 08:40

MIT-ке қабылданған оқушы

Білім • Бүгін, 08:38

Жазата жеткізген жәдігер

Жәдігер • Бүгін, 08:35

Берекенің бесігі

Көрме • Бүгін, 08:33

«Алтын ғибадатханада» күйреген сенім

Әдебиет • Бүгін, 08:30

Актер шындығы қайда жоғалды?

Өнер • Бүгін, 08:28

Сәулелі кеңістіктің секемшіл суреті

Әдебиет • Бүгін, 08:25

Нөкерсіз жүрген, нөсерге төзген

Тұлға • Бүгін, 08:23

Тасқынға тастүйін дайындық

Су тасқыны • Бүгін, 08:20

Тағдырын таныған таланттар

Әдебиет • Бүгін, 08:18

Барлық жаңалықтар