Соңғы қоңырау: Елімізде 215 мыңнан астам түлек мектеппен қоштасты

Фото: Ашық дереккөз

Оқу-ағарту министрлігінің мәліметінше, биыл 31 мыңнан астам оқушы – 9-сыныпты үздік аяқтайтындар қатарында. Ал 11-сыныпты үздік аяқтауға – 18 мың оқушы үміткер. Бүгінде еліміздің білім беру ұйымдарында 420 мыңнан астам педагог еңбек етіп келеді.

Ал Президент тапсырмасымен қолданысқа берілген «Келешек мектептерінде» 220 мыңнан астам оқушы білім алып, 16 мыңға жуық педагог жұмыс істейді. Ұлттық жобасы аясында биыл 217 заманауи мектеп пайдалануға берілген. Оның 84-і ауылдық елді мекендерде орналасқан.

Астана мектептеріндегі орын тапшылығы мәселесі қалай шешілмек?

Биыл мектеп бітіру салтанаттарын өткізу тәртібіне қатысты талаптар күшейтілді. Оқу-ағарту министрлігі мен жергілікті атқарушы органдардың бірлескен шешіміне сәйкес, түлектерге арналған кештерді мейрамхана, дәмхана, банкет залы, демалыс орны немесе табиғат аясында ұйымдастыруға тыйым салынды.

Министрліктің мәліметінше, аттестат пен диплом табыстау рәсімдері тек білім беру ұйымдарының қабырғасында өткізілуі тиіс. Сондай-ақ ата-аналардан ақша жинауға, мұғалімдерге сыйлық жасауға немесе өзге де материалдық шығындарды талап етуге жол берілмейді. Оның орынына 25 мамыр күні еліміздің барлық мектептерінде «Білімім – Отаныма!» тақырыбында бірыңғай сынып сағаты өткізіледі.

«Даңғойлық жәрмеңкесіне айналды»: Депутат мектеп бітіру кештеріне қыруар қаржы жинау туралы

Сонымен қатар бітіруші түлектерге арналған емтихан мерзімдері белгілі болды. 9-сынып оқушылары үшін қорытынды емтихандар 29 мамыр – 11 маусым аралығында өтеді. Олар міндетті пәндер бойынша төрт жазбаша емтихан тапсырады.

Ал 11-сынып түлектеріне арналған мемлекеттік емтихандар 2 маусым – 15 маусым аралығында өтеді. Оқушылар бес емтихан тапсырады, оның бірі ауызша форматта өткізіледі. Негізгі және жалпы орта білім туралы аттестаттар 17-18 маусым аралығында тапсырылады.