Вьетнамда қазақ қызы жоғалып кетіп, оны отандастары тауып алды

Желіде Вьетнамда демалып жүрген кезінде жоғалып кеткен қазақстандық қызды құтқару оқиғасы қызу талқыланып жатыр.

Болған жағдай туралы қазақстандық блогер Александр Цой айтып берді. Оның сөзінше, оған алматылық Гаухар Каспакова хабарласып, демалыстың екінші күнінде олардың 10 жасар қызы Айшаның жағажайда қалай жоғалып кеткенін айтып берген. 

Әйелдің айтуынша, сол сәтте ата-анасы шезлонгта демалып жатқан, ал қыз бала су жағасында ойнап жүрген. Әкесі оны мезгіл-мезгіл бақылап отырған, алайда бірнеше минуттан соң бала көзден таса болған.

Отбасы қызын жағажайдан өз бетінше іздей бастайды. Іздестіру жұмыстарына күзет қызметі де қосылады. Дегенмен, жарты сағат бойы қызды табу мүмкін болмаған. Анасы полицияға жүгіну үшін қонақүйге қарай жылап жүгіргенін айтады. Қонақүйдің ресепшн бөлімінде қауіпсіздік қызметі оған қызының суретін көрсеткен.

Белгілі болғандай, қыз бала суға түсіп, қайта шыққан кезде ата-анасын таба алмай қалған. Содан кейін бала жағалау бойымен басқа бағытқа кетіп, адасқанын түсінген соң жағажайдағы бір ер адамнан көмек сұраған.

Ол адам жұбайы Айнұрмен бірге демалып жүрген қарағандылық Алмаз есімді Қазақстан азаматы болып шықты. Қыздың анасының айтуынша, ерлі-зайыптылар баланы сабырға шақырып, өздері тұрақтаған қонақүйге алып барған. Содан соң оны суретке түсіріп, көршілес қонақүйлердің ресепшн бөлімдеріне таратып жіберген. Кейін олар Айшаны ата-анасына өздері әкеліп берген.

Қыздың анасы қиын сәтте баласын қайтаруға көмектескен отандастарына шексіз алғыс айтатынын жеткізді. Бұл оқиға әлеуметтік желіде үлкен резонанс тудырып, қолданушылар қазақстандық ерлі-зайыптыларға бейжайлық танытпағаны және адамгершілігі үшін алғыс жаудырып жатыр.

Бүгін, 16:06