Жер бетінде қарулы қақтығыс тоқтамай тұр

«Жылқыдан асқан жүйрік жоқ». Жүйткіп жылқы жылы да жетті. Өткен жылымыз да заулап өте шықты. 

Әлем жаңа жылды қарсы алады, бірақ бітпеген іс көп. Жаңа жылда тату болайық, соғысты тоқатайық деп жатқан ешкім жоқ. 130-дан аса шиелініс сол бойы шешімін таппады. Бұл Халықаралық Қызыл Крест ұйымы мәлімдеген ресми ақпар.

Бұл көрсеткіш бұдан 15 жыл бұрынғы жағдайдан екі есе артық. Биылдың өзінде 22 елде жағдай ушыққан. Қан төгіліп, аш-жалаңаштар көбейді.

Биыл қарулы қақтығыстан әлем бойынша 240 мың бейбіт тұрғын қаза тапты. Соғыс жөнінде есеп жүргізетін халықаралық ACLED ұйымының дерегіне сүйенсек, әлем халқының 16%-ы қақтығыс ортасында қалды. Бұл шамамен 831 миллион адам.  

Әсіресе Украина мен Ресей, Таяу Шығыстағы қақтығыстар, Үндістан мен Пәкістан, Судан, Конго Демократиялық Респубикасы, Мьянма, Батыс Африкадағы елдер, Таиланд пен Камбоджа арасы ушығып, ауыр зардабын халық тартты. 

Қақтығыс оты кез келген уақытта тұтанып кетуі мүмкін. Ол орын да, уақыт та талғамайды. Тағы бір өткір мәселе – халықаралық құқыққа деген құрметтің азайып бара жатқаны. Көбіне соғыс ережелері сақталмайды. Қақтығыс алаңында бейбіт тұрғындармен қатар оған көмектесетін гуманитарлық ұйым өкілдерінің қауіпсіздігі сақталуға тиіс. 

Мирьяна Сполярич-Эггер, Халықаралық Қызыл Крест Комитетінің президенті:

- Әлемде бейбітшілік сақталауы үшін бекітілген халықаралық құқық бар. Биыл соның заңдарынан аттағаны үшін, Израильдің халықаралық саясаттағы беделіне нұқсан келді. Тағылған айып пен айтылған сын да есеп жоқ. Ресми дерекке сүйенсек, бір жыл ішінде Израиль Палестина, Ливан, Сирия, Йемен, Иран және Қатарға қарсы 12 мың 500 әскери операция жүргізген.