AMANAT фракциясы қазақстандық киноға тең жағдай жасалуына қол жеткізді

«AMANAT» партиясы фракциясы отандық киноиндустрияның мүддесін қорғап, қазақстандық кинематографистерге әділ жұмыс жағдайы жасалуына және кинопрокат нарығындағы заңбұзушылықтардың жойылуына қол жеткізді, – деп хабарлайды Aikyn.kz сайты.

Бұған дейін режиссерлер мен продюсерлер тарапынан депутаттар атына бірқатар шағым келіп түскен еді. Олардың айтуынша, ірі кинотеатр желілері прокаттың алғашқы күнінен бастап кассалық түсімнің 50%-на дейінгі бөлігін ұстап қалып отырды. Бұл қаражат пайдадан емес, жалпы валдық түсімнен алынды. Бұдан бөлек, фильмдер көрсетілімге жіберілуі үшін міндетті түрде төленуге тиіс «жарнама бюджеті» де таңылды.

Аталған мәселе жан-жақты қаралып, әділдікті қалпына келтіру мақсатында «AMANAT» фракциясы Бәсекелестікті қорғау және дамыту агенттігінің атына депутаттық сауал жолдады. Аталған сауалда нарықтағы монополия белгілері айқын көрсетілді. Қолда бар деректерге сәйкес, Kinopark және Kinoplexx желілері ел аумағындағы кинозалдардың 40%-на жуығын бақылауда ұстап отыр. Алматы қаласындағы кинопрокат нарығының көлемі 16,8 млрд теңгені құрайды. Соның ішінде 6,3 млрд теңге немесе 37,9%-ы «Кинопарк Центр» ЖШС-ның үлесіне тиесілі.

Агенттік Kinopark – Kinoplexx Theatres кинотеатрлар желілерінің әрекетінде үстемдік ету жағдайын теріс пиғылда пайдалану белгілері бар екенін растады. Сонымен қатар міндетті жарнамалық шығындар отандық фильмдердің прокатқа шығуына кедергі болғаны да дәлелденді.

«AMANAT» фракциясының ұстанымы нәтижесінде аталған заңбұзушылықтар жойылды. Жарнамалық бюджеттерді күштеп таңу тәжірибесі тоқтатылып, «кіру ақысы» алып тасталды. Фильмдерді экранға шығару тәртібін реттейтін бірыңғай әрі ашық ережелерді бекітетін жария регламентін әзірлеу жұмысы басталды.

«AMANAT» фракциясы регламентті әзірлеу процесін бақылауда ұстап, әділ бәсекелестік орта қалыптастыру және креативті индустрияны қолдау бағытындағы жүйелі жұмысын жалғастыра береді.