Экологтар атыраулықтардың қоғамдық тыңдауларға қатысуын төмен деп бағалады

Атырау облысында экологиялық мәселелерге арналған қоғамдық тыңдауларға тұрғындардың белсенділігі төмен болып отыр. 

«Глобус» экологиялық‑құқықтық бастамалар орталығының директоры Галина Чернованың айтуынша, халықтың басым бөлігі экологиялық заңнаманы жеткілікті білмейді және тыңдауларды өз құқықтарын қорғау құралы ретінде пайдалана алмайды.

Соңғы жылдары өңірдегі тыңдаулар жиі дау‑жанжалға ұласқан. 

Биылғы мамырда Дамбы ауылында NCOC компаниясының Каспий теңізінде түбін тереңдету жобасы талқыланғанда экологтар мен белсенділер экожүйеге және бекіре популяциясына қауіп барын айтып, жобаны қатты сынға алды. 

Кейін Save the Caspian Sea қозғалысы тыңдаудан соң қысымға ұшырағанын мәлімдеді.

2025 жылдың күзінде Доссорда Қашаған кен орнын 2050 жылға дейін игеру жобасы бойынша тыңдаулар өткенде залда жергілікті тұрғындар аз болды, ал қатысушылардың басым бөлігі компания қызметкерлері еді. Қоғамдық ұйымдар мұны «тыңдаулардың мәнін бұрмалау» деп атады.

Галина Чернованың пікірінше, мәселе тек халықтың белсенділігінің төмендігінде емес, сонымен бірге ҮЕҰ жетекшілерінің экологиялық құқық саласындағы білімінің жеткіліксіздігінде. 

- Өкінішке қарай, оларда туған жерді, денсаулықты және өмірді қорғау үшін заңды қолдану тәжірибесі жоқ, – деді ол.

«Глобус» орталығының өкілдері аймақтағы өндірістік жүктеменің артуы мен экологиялық жағдайдың нашарлауына байланысты қоғамның экологиялық жобалар мен шешімдерді талқылауға белсендірек қатысуы қажет деп есептейді.

Анастасия ШЕРСТЯНКИНА

Бүгін, 18:30