Кішкентай ауылдың балалары әкімге жолдауымен әлеуметтік желілерді тебірентті

Павлодар облысы Коряковка ауылының оқушылары заманауи футбол алаңын салып беруді сұрап, жантебірентерлік бейнеүндеу жариялады. Қазір балалар ауыл ортасындағы ескі бос жатқан жерде ойнауға мәжбүр. Олардың айтуынша, ол жерде жарақат алып қана қоймай, денсаулыққа зақым келу қаупі де жоғары, деп хабарлайды Tengri Life.

Павлодар облысы Коряковка ауылының оқушылары заманауи футбол алаңын салып беруді сұрап, жантебірентерлік бейнеүндеу жариялады. Қазір балалар ауыл ортасындағы ескі бос жатқан жерде ойнауға мәжбүр. Олардың айтуынша, ол жерде жарақат алып қана қоймай, денсаулыққа зақым келу қаупі де жоғары, деп хабарлайды Tengri Life.

Өз үндеулерінде олар жергілікті шенеуніктерден бұл мәселеге, әсіресе Балаларды қорғау күні мен жазғы демалыс қарсаңында назар аударуды сұрайды.

Қазіргі уақытта жергілікті балалар тұрғындар өз күшімен бейімдеп алған ауыл ортасындағы қолдан жасалған футбол алаңында ойнап жүр.

Коряковка ауылы Павлодардан небәрі 20 шақырым жерде орналасқан.

"Біз Коряковкада 14 жылдан бері тұрамыз. Басында балалар осы бос жерде жай ғана доп қуалайтын. Кейін қолдан темір қақпа жасап, жерге көміп қойдық, бар болғаны сол. Былтыр көпжылғы өтінішімізден соң қақпаға тор ілінді. Соның арқасында балалар жаз бойы осы алаңда жүрді", – дейді Коряковка ауылының тұрғыны Жанна Тәтиева.

Тұрғынның айтуынша, ол жергілікті шенеуніктерден балаларға шағын футбол алаңын салып беруді бірнеше рет сұраған, ауыл және аудан әкімдеріне де жазған.

"Әр кез бір ғана жауап естиміз: "қазір ақша жоқ, күте тұрыңыздар". Бұл жағдайдың созылып келе жатқанына бірнеше жыл болды. Балалар ерекше ештеңе сұрап отырған жоқ қой, оларға тек футбол ойнайтын қауіпсіз орын керек. Бұл бос жатқан жерге ешкім жауап бермейді. Ертең осы қолдан жасалған қақпа баланың үстіне құласа, "өздеріңіз кінәлісіздер" деп шыға келеді", – деп кейіді Тәтиева.

Ауыл ортасындағы бұл бос жер жергілікті балалар мен жасөспірімдер бос уақытын өткізетін жалғыз орын болып отыр.

Одан сәл ары бүлдіршіндерге арналған ойын алаңы төрт жыл бұрын орнатылған, бірақ неге екені белгісіз, оған арнайы төсеніш төселмеген. Ауыл тұрғындары ең болмаса өзен құмын төгіп, дауыл құлатқан қысқы ағаш сырғанақ қалдығын алып тастауды сұрағандарын айтады, алайда әзірге ешқандай нәтиже жоқ.

Павлодар ауданының әкімдігі Tengrinews.kz тілшісіне Коряковка тұрғындарының өтінішінен хабардар екенін, бірақ биыл ауыл бюджеті электр желілерін жаңартуға есептелгенін хабарлады.

"Коряковка ауылы бойынша облыстық бюджеттен электр беру желілерін жөндеуге 80 миллион теңгеден астам қаражат бөлінді. Бұл тозу деңгейін төмендету және қолайсыз ауа райында жарықтың өшу қаупін азайту үшін жасалып отыр. Қазір жаңа желіні қосу жұмыстары жүріп жатыр", – деді Павлодар ауданының әкімі Дидар Ыбраев.

Оның айтуынша, шағын футбол алаңын салу, сондай-ақ ауылдық клубты күрделі жөндеуден өткізу алдағы жылдардың жоспарында бар.

"Екі мәселені де ауыл тұрғындары жиі көтереді. Жобалық-сметалық құжаттамаға сәйкес, Коряковка ауылында шағын футбол алаңын салу құны 24,5 миллион теңгеден асады. Қаражатты 2027–2028 жылдардың бюджетінен қарастырамыз. Балалар қауіпсіздігі мәселесіне, соның ішінде осындай бейімделген алаңдарға да көңіл бөлеміз", – деп сендірді Ыбраев.

Бүгінде Коряковкада 172 адам тұрады, оның 35-і бала, соның ішінде 28-і мектеп оқушысы.

Фото Коряковка ауылы тұрғындарынан

Google News арқылы жаңалықтарымызды қадағалаңыз