Павлодар облысының әкімі Ертістің тазалығын көрсету үшін тікелей эфирде өзенге шомылды

АЛМАТЫ, 6 шілде - Sputnik. Павлодар облысының әкімі Асайын Байханов қаланың орталық жағажайынан тікелей эфирге шығып, трансляция кезінде Ертіс өзеніне шомылды. Ол осылайша өзен суының ластанғаны туралы интернетте тараған ақпаратқа жауап берді, деп хабарлайды Sputnik Қазақстан.
"Біздің орталық жағалау, бұл жерде қаншама адам өзінің демалысын өткізіп жатыр. Кейбір адамдар Ертістің суы таза емес деп жатыр, пікірлерді оқып жүрмін. Бұл шындыққа жанаспайды. Ертістің ағысы өте қатты, жылына 32 млрд текше метр су өтеді. Демек күніне 80 млн куба метр су ағады. Негізінде өзеннің көзі Моңғолия мен Шығыс Қазақстан таулары, соның суы ерігеннен пайда болады. Ертістің суы таза", - дейді әкім.
Әлеуметтік желідегі тікелей эфирде Асайын Байханов өзенге өзі түсіп, тазалықты көрсетті.
"Өзен таза, жағалауы құмды. Міне, суды қарасаңыздар тап-таза. Күнге ұялы телефон дұрыс көрсетпей тұр. Судың ағымы қатты болғандықтан, су таза. Лас, лай су болуы мүмкін емес. Біз суды жиі сараптамадан өткіземіз", - дейді Павлодар облысының әкімі.
Әкім тіпті басымен суға сүңгіп көрсетті. Ол өзен суын алақанына алып та, ұялы телефонды суға батырып та көрсетті.