Семейде жоғалған 3 жасар сәби табылды

АСТАНА, 6 шілде – Sputnik. Семейде Төтенше жағдайлар министрлігінің құтқарушылары жоғалған баланы ата-анасына табыстады, деп хабарлады ведомствоның баспасөз қызметі.

Ертіс өзенінің жағалауындағы қалалық жағажайды патрульдеу кезінде ТЖД жедел-құтқару жасағының қызметкерлері ересектердің қарауынсыз жүрген 2023 жылы туған баланы байқап қалған.

"Құтқарушылар оқиғаның мән-жайын анықтап, ата-анасын іздеуді ұйымдастырды. Көп ұзамай баланың ата-анасы табылып, сәби олардың қарауына тапсырылды. Медициналық көмек қажет болған жоқ", - деп жазылған хабарламада.

ТЖМ су айдындарында демалу кезінде балаларды бір сәтке де қараусыз қалдыруға болмайтынын ескертті.

"Қарапайым қауіпсіздік қағидаларын сақтау қайғылы жағдайлардың алдын алуға көмектеседі", - дейді құтқарушылар.