СҚО да айына 300 ден астам офтальмологиялық ота тегін жасалады

Әлеуметтік медициналық сақтандыру қорының СҚО бойынша филиалының мәліметінше, қазір көзге ота жасату үшін шетел асудың немесе үлкен қалаларға барудың қажеті жоқ. Бүгіндері көптеген офтальмологиялық қызмет түрі Петропавлда да қолжетімді.

Филиал мәліметтеріне сәйкес, СҚО-да 2026 жылдың қаңтарында 365 пациентке жалпы сомасы 108,8 млн теңгеге офтальмологиялық операциялар жасалды. Оның 197-сі жедел медициналық жәрдем желісі бойынша, ал 163 ота стационарды алмастыратын көмек желісі бойынша атқарылды. Олардың қатарында көздің бұлдырланып көруіне әкелетін катарактаны арнайы әдіспен алып тастау, көз ішіндегі қысымды төмендетуге бағытталған операциялар, көздің қабығы жыртылған жағдайда оны тігу сияқты емдеу тәсілдері бар.

Сондай-ақ, көз бұршағы орнынан жылжып кеткен жағдайда оны алып, орнына жасанды линза қою немесе көз ішіндегі линзаны арнайы тәсілмен бекіту секілді жоғары технологиялық операциялар да жасалады. Бұл әдістердің барлығы науқастардың көру қабілетін жақсартуға және көз ауруларының асқынуын болдырмауға бағытталған.

Офтальмологиялық көмек алу үшін сырқаттың МӘМС жүйесіндегі мәртебесі маңызды. Қазіргі уақытта СҚО-да 520 мыңға жуық адам тұрса, соның 59 мыңға жуығы медициналық сақтандырылмаған.

Жалпы 2025 жылы облыста МӘМС аясында 1 млрд 249 млн теңге сомасына 4 057 операция жасалған екен.

Бұған дейін Қазақстанда күрделі оталардың 80% ел ішінде жасалатындығын жазған едік.