“Барлығын ұшақтан шығарды“ Астанаға дейінгі рейс түсініксіз себеппен кешіктірілді

FlyArystan әуекомпаниясының Алматыдан Астанаға бағытталған кезекті кешкі рейсі екі сағатқа кідірді. Жолаушылардың бірінің қол жүгіне қатысты жанжалдан кейін ол рейстен шығарылған. Алайда қауіпсіздік ережелеріне сәйкес, оқиға мұнымен біткен жоқ - ұшақтағы барлық жолаушыны эвакуациялап, қайта тексеруге тура келген, - деп хабарлайды Tengri Travel.

Не болды?

FS7063 рейсіндегі оқиға туралы жолаушылардың бірі әлеуметтік желіде былай деп жазды:

"FlyArystan, бұл қалыпты жағдай ма? Бір жолаушының қол жүгіне байланысты (небәрі 400 грамм артық болғаны үшін) бүкіл ұшақты - яғни 200-ден аса адамды - 50 минутқа жуық бортта ұстап, рейсті екі сағатқа кешіктірді. Оның үстіне жолаушы сол 400 грамм үшін тиісті 11 000 теңгені төлеген еді. Содан кейін бәрін ұшақтан түсіріп, қайта тексерістен өтуге жіберді", - делінген жазбада.

Жазба авторының айтуынша, кейінірек жолаушы рейстен шығарылған. Содан соң қалған адамдардан ұшақтан шығуды және қайта тексеруден өтуді сұраған.

Скриншот: Threads

Біз пікір алу үшін әуекомпанияның баспасөз қызметіне хабарластық. Ондағылар рейстің кешіккенін растап, ұшудың кейінге шегерілуіне борттан түсірілген жолаушы себеп болғанын түсіндірді.

"FlyArystan 2026 жылғы 24 тамызда Алматы - Астана бағыты бойынша FS7063 рейсі ұшар алдында жолаушының белгіленген тасымалдау ережелерін бұзып, тәртіпсіздік танытқанын хабарлайды. Ұшу қауіпсіздігін қамтамасыз ету мақсатында әуе кемесінің командирі бұл жолаушыны тасымалдаудан бас тарту туралы шешім қабылдады", - деді әуекомпаниядағылар.

Тасымалдаушының баспасөз қызметі жолаушы рейстен шығарылғаннан кейін экипаж бен авиациялық қауіпсіздік қызметі тиісті процедураларды жүргізгенін қосып өтті.

"Жолаушының рейстен шығарылуына байланысты, авиациялық қауіпсіздіктің белгіленген талаптарына сәйкес, жолаушылар толықтай эвакуацияланып, әуе кемесіне қайтадан ұшу алдындағы тексеру жүргізілді. Қажетті процедуралар аяқталғаннан кейін жолаушылар қайтадан отырғызуға шақырылды", - деді компания өкілдері.

Тасымалдаушы мәліметінше, рейс 1 сағат 52 минутқа кешіккен. Баспасөз қызметі келтірілген қолайсыздықтар үшін кешірім сұрады.

"FlyArystan жолаушылардан мәжбүрлі күту мен кешігуге байланысты туындаған қолайсыздықтар үшін кешірім сұрайды. Сонымен қатар, ұшу қауіпсіздігін қамтамасыз ету үшін қабылданатын шаралар міндетті болып табылады", - деп бөлісті әуекомпания.

Тағы оқыңыз: Қазақстандықтар қар барысы бейнеленген ұшақ көрінбей кеткенін байқады: не болды?

Google News арқылы жаңалықтарымызды қадағалаңыз