ЕО Украинаны ұйымға қабылдау жөніндегі келіссөзді маусым саммитіне дейін бастамақ БАҚ

АСТАНА, 26 мамыр – Sputnik. Еуроодақ Украинаны ұйымға қабылдау туралы тікелей келіссөзді 18-19 маусым күндері өтетін Еуропалық кеңес саммитіне дейін бастауды жоспарлап отыр, деп жазды Euractiv еуропа шенеунігіне сілтеме жасап.

"Еуропа елдері Украинамен ЕО-ға кіру жөніндегі келіссөздің алғашқы кезеңін бастау туралы шешімді келесі айдағы саммитке дейін қабылдауға үміттеніп отыр", - деп жазылған мақалада.

Басылымның жазуынша, ендігі жағдай Венгрияның жаңа үкіметінің ұстанымына байланысты болады. Өйткені бұрынғы премьер-министр Виктор Орбан Украинамен тікелей келіссөзді бастауға вето қойған болатын.

Бұған дейін Economist ЕО елдері Украинадағы жемқорлық деңгейіне байланысты оның одаққа қосылу мүмкіндігіне күмәнмен қарайтынын хабарлаған еді.

Кандидат мәртебесін алу – ЕО-ға кіру жолындағы ұзақ процестің бастамасы ғана. Мысалы, Tүркия 1999 жылдан, Македония 2005 жылдан, Черногория 2010 жылдан, ал Сербия 2012 жылдан бері кандидат мәртебесінде тұр. Ал Еуроодаққа соңғы болып Хорватия 2013 жылы қабылданды, оның өзінде қосылу процесі он жылға созылған.