Еуропа Одағы Украинадағы қақтығыста делдал бола алмайды Эстония СІМ басшысы

АСТАНА, 25 мамыр – Sputnik. Эстония сыртқы істер министрі Маргус Цахкна Еуропа одағының Украинадағы қақтығыста делдал ретінде әрекет етуіне қарсы екенін мәлімдеді. Оның айтуынша, еуропалық елдер мұндай рөлге қажетті бейтараптықты сақтамайды.

"Делдалдың рөлі – Украина мен Ресей арасында мәміле табу үшін бейтарап ұстанымда болу. Бұл біздің мақсатымыз емес. Біздің мақсатымыз – Еуропаның болашақ қауіпсіздік архитектурасын қалыптастыру", - деді Маргус Цахкна.

Ол бұл құрылымда Украинаның рөлі үлкен болатынын айтады.

"Алайда мұны бейтарап делдал ретінде жасау мүмкін емес", - деп министр атап өтті.

Министрдің пікірінше, Еуропада барлық тарапты қанағаттандыратын және барлығының атынан сөйлей алатын өкілді табу қиын.

Бұған дейін Франция президенті Эммануэль Макрон Еуропаға Ресей президенті Владимир Путинмен диалогты қайта бастау пайдалы болатынын айтқан. Италия премьер-министрі Джорджа Мелони де Ресеймен Украина мәселесі бойынша диалогты қайта бастап, ЕО-ның арнайы өкілін тағайындауды ұсынған. Сонымен қатар Финляндия президенті Александр Стубб Еуропаға Ресеймен Украина мәселесі бойынша жоғары деңгейдегі диалогты қайта бастау керек екенін мәлімдеді.

Ресей сыртқы істер министрі Сергей Лавров Ресей диалогтан бас тартпайтынын, бірақ қазіргі Еуропа басшыларымен келісімге келу қиын болуы мүмкін екенін атап өтті.