Сәтбаев университеті инновациялық құрылыс материалдарын өндіру жобасын жалғастырады

Бүгін университетте Сәтбаев университеті, «Diatomite» өндірістік компаниясы және жоба инвесторы арасында стратегиялық ынтымақтастық туралы меморандумға қол қойылды.

Құжат аясында тараптар Сәтбаев университетінде әзірленген ғылыми-технологиялық шешімдерді өнеркәсіптік деңгейге шығарып, оларды өңірлік өндірісте қолдану мүмкіндіктерін қарастырады. Атап айтқанда, Жамбыл облысында, Тараз қаласында Diatomite брендімен инновациялық құрылыс материалдарын, оның ішінде құрғақ құрылыс қоспаларын өндіретін өндірісті іске қосу жобасын бірлесіп пысықтау жоспарланып отыр.

Алдағы кезеңде тараптар өндірістік алаңды анықтау, шикізат базасы мен инженерлік инфрақұрылымның мүмкіндіктерін бағалау, өндірістік қуатты белгілеу, бизнес-модель мен жол картасын әзірлеу, сондай-ақ өндірісті іске қосу кезеңдерін айқындау бағытында жұмыс жүргізеді. Жобаның негізгі мақсаты – отандық ғылыми әзірлемелерді нақты өндірістік үдерістерге енгізу арқылы құрылыс индустриясы үшін заманауи әрі бәсекеге қабілетті материалдар өндірісін дамыту.

Серіктестіктің әр қатысушысы жобаға өз құзыреті мен тәжірибесіне сәйкес үлес қоспақ. Сәтбаев университеті ғылыми-техникалық сүйемелдеуді қамтамасыз етіп, университет ғалымдары әзірлеген технологиялық шешімдерді ұсынады. «Diatomite» өндірістік компаниясы өндірістік ноу-хау, технологиялық регламенттер, мамандарды оқыту және өнім сапасын технологиялық сүйемелдеу бағыттарына жауап береді. Ал жоба инвесторы жобаның инвестициялық, өндірістік және инфрақұрылымдық бөлігін қамтамасыз етуге атсалысады.

Сәтбаев университетінің ректоры Мейрам Бегентаевтың айтуынша, ғылыми әзірлемелердің нақты экономикаға енгізілуі заманауи университеттің маңызды міндеттерінің бірі.

«Біз үшін ғылымның нәтижесі зертхананың ішінде немесе ғылыми жарияланым бетінде ғана қалмауы маңызды. Ғалымның идеясы нақты технологияға, технология – өндіріске, ал өндіріс – қоғамға қажетті өнімге айналған кезде ғана ғылымның әлеуеті толық ашылады. Сондықтан біз университетте жасалған ғылыми әзірлемелерді нақты өндіріске енгізуге және оларды өңірлерде масштабтауға ерекше мән береміз. Бұл ретте студенттер мен жас ғалымдар үшін де үлкен мүмкіндік қалыптасады: олардың ғылыми ізденістері нақты өндірістік міндеттерді шешуге бағытталып, ел экономикасына үлес қоса алады», – деді Мейрам Бегентаев.

Университет басшылығы бұл жобаны ғылым мен өндірістің байланысын нығайтатын маңызды бастамалардың бірі ретінде қарастырады. Өйткені ғылыми жұмыстың құндылығы оның теориялық нәтижесімен ғана емес, нақты өмірде қолданылуымен де өлшенеді. Университет қабырғасында әзірленген технологияның өндірістік деңгейге шығуы – ғылыми идеяның қоғам игілігіне қызмет ете алатынын көрсететін нақты мысал.

Бұл бастама білім алушылар мен жас зерттеушілер үшін де маңызды мотивациялық мәнге ие. Студенттің, магистранттың немесе жас ғалымның зерттеуі ғылыми мақала немесе диссертация аясында қалып қоймай, болашақта жаңа технологияға, өнімге немесе өндірістік жобаға айналуы мүмкін. Осы тұрғыдан алғанда, бүгінгі серіктестік жас буынға ғылыммен айналысудың практикалық маңызын көрсетіп, өз зерттеулерін нақты өндірістік мәселелермен байланыстыруға жаңа мүмкіндіктер ашады.

«Ғылымнан өндіріске» қағидаты Сәтбаев университетінің ғылыми-технологиялық даму бағыттарының бірі болып отыр. Университет отандық ғылыми әзірлемелерді коммерцияландыруға, өндіріс орындарымен серіктестікті күшейтуге және ғылыми нәтижелерді ел экономикасының нақты секторларына енгізуге басымдық береді.

Таразда инновациялық құрылыс материалдарын өндіретін жаңа өндіріс ашу жөніндегі жоба да осы мақсатқа бағытталған. Оның жүзеге асуы өңірде жаңа өндірістік мүмкіндіктер қалыптастыруға, отандық құрылыс материалдарының үлесін арттыруға, ғылыми-технологиялық әзірлемелерді коммерцияландыруға және білікті мамандар үшін жаңа кәсіби мүмкіндіктер жасауға ықпал етуі мүмкін.

Сәтбаев университеті үшін бұл бастама ғылыми идеяның зертханадан өндірістік алаңға дейінгі жолын көрсететін маңызды тәжірибе. Университеттің басты мақсаты білім мен ғылымды өндірістің нақты қажеттіліктерімен ұштастырып, Қазақстанның технологиялық дамуына үлес қосатын жобаларды көбейту.

Бүгінгі меморандум осы бағыттағы жұмыстардың кезекті қадамы. Ғылыми ізденіс пен өндірістік тәжірибе, университеттік білім мен бизнес мүмкіндігі бір арнаға тоғысқан жағдайда отандық технологиялардың бәсекеге қабілеттілігін арттыруға және жаңа өндірістерді қалыптастыруға мүмкіндік мол. Ең бастысы, бұл Қазақстанда жасалған ғылыми идеялардың Қазақстан экономикасында нақты өнімге айналуы үшін жасалған тағы бір маңызды қадам.