​Air France және Airbus 2009 жылғы әуе апатына байланысты кінәлі деп танылды

Париж апелляциялық соты Air France авиакомпаниясы мен Airbus өндірушісін 2009 жылы Атлант мұхитына құлаған AF447 рейсінің ісінде «абайсызда кісі өлтіру» бабымен кінәлі деп тапты, деп хабарлайды BBC. 

Бұл апатта 228 адам қаза тапқан болатын.

Сот шешімінде екі компанияның да «ерекше және толық жауапкершілігі» бар екені айтылды. Тергеу деректеріне сәйкес, лайнер дауыл кезінде басқаруды жоғалтып, құлдырау режиміне кіріп, 11,5 км биіктіктен мұхитқа құлаған.

Алғашқы сот инстанциясы 2023 жылы компанияларды ақтап шыққан еді, алайда сегіз аптаға созылған апелляциялық тыңдаудан кейін шешім өзгерді.

Airbus датчиктердегі ақаулардың маңызын дер кезінде бағаламағаны үшін, ал Air France пилоттарды мұндай жағдайға арнайы дайындамағаны үшін кінәлі деп танылды.

Прокуратура әр компанияға 225 мың еуро көлемінде айыппұл салуды талап етті. Қаза тапқандардың туыстары бұл соманы «символикалық жаза» деп сынға алды.

Ассоциация жетекшісі Даниэль Лами: «Ақыры әділет жүйесі біздің қайғымызды мойындады. Бұл беделді компаниялар енді технологиялық менмендіктің артына тығыла алмайды», – деді.

Airbus шешімді қабылдағанымен, оны қайта қарауды көздеп отыр. Бұл үкім екі компанияның беделіне елеулі соққы болуы мүмкін.

Катастрофа француз авиациясы тарихындағы ең ірі апат болып саналады. Жолаушылардың арасында Франция, Бразилия, Германия азаматтары басым болған. Іздеу жұмыстары бірнеше жылға созылып, қара жәшіктер тек 2011 жылы табылды.

Бұл іс авиация қауіпсіздігі саласында үлкен өзгерістерге себеп болды: пилоттарды оқыту бағдарламалары қайта қаралып, датчиктер жаңартылды.

Бүгін, 16:22