“Балалармен ұшамыз“ ата аналар ескеруі тиіс 5 маңызды ереже

Баламен ұшақпен саяхаттау әдеттегі сапарға қарағанда мұқият дайындықты талап етеді. Баланы қашан жалғыз жіберуге болады? Сәби үшін ақы төлеу керек пе? Бортқа су мен балалар тағамын алып өтуге рұқсат па? Tengri Travel сапар алдында білу керек негізгі ережелерді жинақтады.

1-ереже. Балаларды алып жүру мәселесін алдын ала шешіңіз

Ережелер ең алдымен баланың жасына байланысты өзгереді.

6 жасқа дейінгі балалар тек кәмелетке толған жолаушымен бірге ұшады. Ешқандай ерекшелік жоқ.

6-дан 16 жасқа дейінгі балалар өз бетінше ұша алады, бірақ әуекомпанияның "Кәмелетке толмаған баланы алып жүру" қызметін рәсімдеу қажет. Мұндай билетті ұшуға дейін кемінде 5 күнтізбелік күн қалғанда брондау керек.

Маңызды жайт: ілесіп жүрусіз балалар сағат 23:00-ден таңғы 06:00-ге дейін тасымалдауға қабылданбайды - бұл Қазақстан заңнамасының талабы.

Тіркеуден өткен соң, ата-ана рейс кешігуі немесе тоқтатылуы мүмкін жағдайларды ескеріп, ұшақ әуеге көтерілгенше әуежайда қалуға міндетті. Ұшып барған әуежайда баланы әуекомпания қызметкері қарсы алып, құжаттарын тексергеннен кейін ғана күтіп алушы ересек адамға тапсырады.

Егер сіз баламен бірге ұшсаңыз, бірақ тегіңіз әртүрлі болса, өзіңізбен бірге туу туралы куәлікті алғаныңыз жөн. Әуекомпания туыстықты растайтын құжатты сұратуға құқылы.

2-ереже. Ұшаққа балалар билеті: жас ерекшелігіне қарай тарифтер мен жеңілдіктер

Бағасы баланың жасына және бағытқа байланысты болады.

2 жасқа дейінгі балалар ішкі және халықаралық рейстерде жеке орын алмаса және ересек адамның қолында болса тегін ұшады. Соған қарамастан, баланы брондау тізіміне қосып, отырғызу талонын рәсімдеу қажет.

Егер 2 жасқа дейінгі балаға жеке орын қажет болса, тарифтің 50 пайызы төленеді. Халықаралық рейстерде екі жасқа дейінгі екінші бала үшін де осы ереже қолданылады.

Халықаралық рейстерде 2-ден 12 жасқа дейінгі және ішкі рейстерде 2-ден 15 жасқа дейінгі балаларға арналған билет ересек адам бірге жүрген жағдайда тарифтің 50 пайызын құрайды. Бұл жағдайда балаға жеке орын мен белгіленген норма шегінде тегін багаж беріледі.

3-ереже. Ұшақтағы балалар тағамы мен су: шектеусіз алуға болады

Сұйықтықтарды тасымалдауға қойылған шектеулер балалар тағамына қолданылмайды.

Ұшаққа балаға жол бойына, соның ішінде рейстің кешігуі мүмкін екенін ескере отырып, нақты қажет болатын мөлшерде су, қоспалар, пюре және басқа да өнімдерді алуға болады. Тексеру кезінде ыңғайлы болуы үшін мөлдір ыдыстарды пайдаланған жөн.

Air Astana, FlyArystan, Scat және Sunday Airlines әуекомпанияларындағы балалар тағамы

Әуекомпаниялар не ұсынады:

Air Astana екі жасқа дейінгі балаларға көкөніс, жеміс немесе ет пюресін тегін ұсынады. Оған алдын ала тапсырыс берудің қажеті жоқ. Қажет болған жағдайда бортсеріктер бөтелкені немесе қоспаны жылытып беруге көмектеседі. FlyArystan лоукостер моделі бойынша жұмыс істейді, сондықтан кез келген тағамды, соның ішінде балалар тағамын алдын ала тапсырыс беріп, төлеу қажет. Scat және Sunday Airlines ұшу ұзақтығына байланысты ыстық тамақ ұсынады. Бортта балаларға арналған дайын пюре болмауы мүмкін, сондықтан үйреншікті тағамды өзіңізбен бірге алу ұсынылады. 4-ереже. Салондағы автокресло: тасымалдау шарттары мен өлшемдері

Егер балаға жеке орын рәсімделсе және автокресло әуе тасымалына сертификатталған болса, ұшақта балалардың автокреслосын пайдалануға рұқсат етіледі.

Автокресло корпусында мынадай белгі болуы тиіс: "This restraint is certified for use in motor vehicles and aircraft".

Өлшемдерге қатысты да талаптар бар. Мысалы, Air Astana компаниясында автокресло ені 41 сантиметрден аспауы керек, ал ең жоғарғы габариті 66 × 44 сантиметр.

Егер автокресло талаптарға сәйкес келмесе, оны жүк бөліміне тапсыруға тура келеді. Сапар алдында оның тегін тасымалдау нормасына кіретінін әуекомпаниядан нақтылап алған жөн.

5-ереже. Ұшақта балаға арналған ойын-сауық: жолға не алу керек?

Тәжірибелі ата-аналар жаңа ойыншықтарды әуежайда жүргенде шығармауға кеңес береді - ұшаққа отыратын кезде бала олардан жалығып қалуы мүмкін.

Кішкентайлар үшін тактильді кітаптар, сылдырмақтар мен шағын резеңке ойыншықтар қолайлы. Үлкенірек балалар үшін магнитті пазлдар, карточкалар, сурет салуға арналған көп реттік блокноттар немесе алдын ала мультфильмдер жүктелген планшет пайдалы болады. Құлаққап алуды ұмытпаңыз.

Егер уақыт болса, әуежайдағы ойын бөлмесін пайдаланған дұрыс - бұл баланың ұшу алдында бойындағы қуатын жұмсауына көмектеседі.

Бортсеріктер де көмектесе алады: бөтелкеге жылы су әкеліп беруі, жамылғы ұсынуы немесе сұрақтар туындаса жөн сілтеуі мүмкін.

Қол жүгіне нені салу керек және ұшақ көкке көтерілгенде балаға қалай көмектесуге болады?

Ұшуды жайлы етуге көмектесетін бірнеше қарапайым кеңес бар:

баланы қабаттап киіндіріңіз. Ұшақ іші бірде ыстық, бірде суық болуы мүмкін - жемпірді тез шешіп немесе кигізе алу мүмкіндігі жағдайды айтарлықтай жеңілдетеді; қол жүгіне балаға ғана емес, өзіңізге де ауыстыратын киім жиынтығын салып алыңыз; ұшақ көтерілгенде және қонғанда қысымның өзгеруінен болатын жайсыздықты азайту үшін балаларға емізу немесе емізік, ал үлкенірек балаларға шайнайтын кәмпит немесе есінеу көмектеседі; мүмкіндік болса, дәліз жағындағы орындарды таңдаңыз - баламен бірге орныңыздан тұру және салон ішінде қозғалу оңайырақ болады; әуежайға алдын ала келіңіз. Тіркеу, тексеру және балалармен болатын кез келген күтпеген жағдай әдетте көп уақытты алады. Артық жарты сағат уақыт қажетсіз асығыстықтың алдын алуға көмектеседі.

Google News арқылы жаңалықтарымызды қадағалаңыз

Жазылу